Evento: Leilía

As actividades ao redor do xacemento de arte rupestre da área arqueolóxica de Tourón contan cunha banda sonora, a que lle pon o grupo Leilía. A formación naceu en 1989 da man de seis mulleres co propósito de recuperar do esquecemento a música de tradición oral de Galicia.

Daquela, foi unha aposta pioneira e atrevida, que axiña tivo a súa recompensa internacional grazas á súa beleza e singularidade. Na actualidade, Leilía é un referente tanto para os que queren achegarse á música orixinal de Galicia como para os que buscan a fusión da tradición con sons e instrumentos contemporáneos. Máis de 25 anos sobre os escenarios, cinco discos publicados, unha chea de colaboracións con artistas e grupos como Kepa Junquera, Milladoiro, Emilio Cao, Os Diplomáticos de Monte Alto ou Budiño, e ducias de concertos por todo o mundo.

Tras o concerto,  entre lusco e fusco, visita guiada polo arqueólogo Santiago Vázquez Collazo á área arqueolóxica e visionado nocturno dos petróglifos. Ademais, Pablo Martínez Alemparte, arqueólogo e especialista en astronomía, guiará os asistentes polo firmamento e axudaralles a establecer conexións co xacemento.

A participación en todas as actividades e concertos de Monumenta é libre e de balde.