Nova: Trenor anuncia a licitación da redacción do proxecto das obras de rehabilitación do claustro grande do Mosteiro de Santa María de Sobrado dos Monxes cun investimento de 1,65M€

Sobrado dos Monxes (A Coruña), 28 de abril de 2022.- O delegado da Xunta na Coruña, Gonzalo Trenor, visitou esta mañá o Mosteiro de Sobrado dos Monxes para anunciar a licitación da redacción do proxecto básico e de execución e dirección das obras do claustro grande do mosteiro de Santa María de Sobrado dos Monxes por un importe de 119.790,00€

Trenor lembrou que o Mosteiro de Santa María de Sobrado dos Monxes contará cun novo investimento de 1,65M€ para mellorar a conservación do Claustro Grande unha das iniciativas propostas pola Xunta de Galicia para formar parte do Plan de Recuperación, Transformación e Resiliencia.

O proxecto de restauración iníciase coa posta en marcha do proceso administrativo. “A nosa previsión é que os traballos nesta xoia patrimonial, de especial importancia para toda Galicia pola súa vinculación co Camiño de Santiago, estean completados antes de que remate o ano 2023”, sinalou.

O proxecto centrarase nos sistemas construtivos do claustro grande do mosteiro a través da renovación da cuberta de tella. Para iso, mellorarase o seu aspecto e comportamento para favorecer a ventilación e impermeabilización. Tamén se renovará o illamento térmico co fin de incrementar a eficiencia enerxética do edificio. Todas estas accións, tal e como precisou Trenor, faranse tendo en conta a existencia de fauna protexida na zona, adoptando as medidas máis axeitadas de protección e salvagarda.

O obxectivo desta obra é mellorar a conservación do monumento e abrir á visita pública este terceiro claustro dotándoo de materiais de interpretación e expositivos para o seu uso cultural e turístico. “Este ben é un dos principais mosteiros de orixe medieval de Galicia e a nosa obriga é contribuír a súa conservación ao tempo que compaxinamos a protección co seu uso como recurso sostible e activo que mellore a calidade de vida da zona na que se atopa”, destacou

 O Mosteiro de Santa María de Sobrado, ten un papel complementario como albergue de peregrinos, goza do máximo nivel de protección patrimonial, xa que ademais de recoñecido como Ben de interese Cultural, está asociado a declaración de Patrimonio Mundial dos Camiños do Norte.

Esta nova achega para mellorar a zona do claustro grande súmase aos 2,3 M€ investidos xa pola Xunta de Galicia na conservación do Ben de Interese Cultural nos últimos anos e na creación dun albergue público para peregrinos. Cómpre lembrar que o Goberno galego actuou no conxunto monumental do mosteiro de Santa María de Sobrado dos Monxes cun proxecto integral que permitiu eliminar as filtracións de auga, humidades e contaminación biolóxica. Ademais, nesa ocasión tamén se renovou de forma íntegral a cuberta da igrexa, limpáronse os muros e melloráronse as condicións de habitabilidade e accesibilidade da igrexa acondicionando como espazo de lectura a antiga capela dos monxes no claustro da Hospedería.