Nova: A Agadic subvenciona as salas Ártika e Ensalle de Vigo e Gurugú e Teatro del Andamio da Coruña
03/03/2017
A Agadic subvenciona as salas Ártika e Ensalle de Vigo e Gurugú e Teatro del Andamio da Coruña
Publicou a resolución da súa convocatoria anual de axudas a locais escénicos de xestión privada e capacidade reducida, dotada con 70.000 euros
O apoio a este tipo de espazos compleméntase coa actividade da Rede Galega de Salas, da que forman parte tres das subvencionadas e que neste semestre ofrece unha carteleira de 59 actuacións financiada integramente pola Consellería de Cultura
-
No Title Yet é un dos espectáculos que se pode ver no Teatro Ensalle, un dos beneficiarios das axudas e que forma parte da Rede galega de salas
Santiago, 3 de marzo de 2017.- A Axencia Galega das Industrias Culturais (Agadic) publica hoxe na súa web a resolución pola que adxudica a catro locais os 70.000 euros da súa liña de subvencións a salas de artes escénicas para 2017. Mediante esta convocatoria anual, búscase contribuír á estabilidade deste tipo de espazos, de xestión privada e cunha capacidade máxima de 250 localidades, que desenvolven programacións artísticas de carácter profesional.
Os catro espazos adxudicatarios este ano son Teatro Ensalle (26.609,72 euros) e Ártika Sala Teatro (19.188,67 euros), as dúas de Vigo, e mais Teatro del Andamio (17.774,05 euros) e Sala Gurugú (6.427,56 euros), ambas da Coruña.
Valoración do plan de programación
Entre os criterios que se tiveron en conta na adxudicación destas subvencións, valoráronse a antigüidade das empresas xestoras, a súa pertenza á Rede Galega de Salas, o número de funcións en cartel (excluídas as programadas a través da devandita rede), o número de días con actividade aberta ao público, a contratación de compañías galegas, o desenvolvemento de programas complementarios (fomento de novos creadores, formación ou colaboración con centros de ensino), o plan de comunicación e xestión de públicos e os recursos humanos implicados.
Ademais de con esta liña de subvención, a Agadic contribúe ao funcionamento das salas privadas de artes escénicas a través da Rede Galega de Salas, circuíto do que forman parte tres dos espazos subvencionados este ano (Ensalle, Gurugú e Teatro del Andamio) xunto á Fundación SGAE de Santiago de Compostela e a Sala Ingrávida do Porriño. Esta rede, financiada integramente pola Xunta de Galicia, ofrece durante o primeiro semestre de 2017 un total de 59 representacións escénicas a cargo de 25 compañías.