Nova: Agadic apoia o talento audiovisual con axudas a 13 novos proxectos
04/05/2017
Agadic apoia o talento audiovisual con axudas a 13 novos proxectos
Publícase a adxudicación destas axudas para a escrita individual de guión e para a realización de curtas e de longametraxes cinematográficas
Destínanse 90.000 euros a apoiar a produción das longas dos realizadores Fon Cortizo, Roi Fernández e Antonio Grunfeld
Nuria Mosqueira Varela, César Souto Vilanova, Antonio Chouza López, Marta Pérez Pereiro e Ángeles Huerta son os adxudicatarios en guión, e Álvaro Gago, Miguel Mariño, Alberto Díaz López, Lucía Estévez e Xiana Gómez-Díaz, en curtametraxe
Santiago de Compostela, 4 de maio de 2017.- A Axencia Galega das Industrias Culturais (Agadic) da Consellería de Cultura e Educación publica no seu web a adxudicación das subvencións ao desenvolvemento e promoción do talento audiovisual galego, a través das que destina 145.000 euros a impulsar 13 novos proxectos: cinco de escrita de guión, outros cinco de realización de curtametraxes e tres de longametraxes.
Este programa de axudas ao talento, pioneiro no seu ámbito dentro do panorama audiovisual español, busca favorecer a incorporación de novos creadores á industria audiovisual galega, coa finalidade de promover a xeración de propostas narrativas de especial valor cinematográfico e de contribuír ao enriquecemento cultural de Galicia mediante as distintas formas de expresión audiovisual.
Longas de novos directores
A Agadic mantén o seu investimento nestas subvencións respecto ao ano pasado e volve destinar 90.000 euros a tres proxectos de longametraxes de realizadores que están comezando a súa traxectoria profesional neste formato cinematográfico: 9 fugas, de Fon Cortizo; Ursúas, de Roi Fernánez, presentado por Laura Villaverde; e Manoliño Nguema, de Antonio Grunfeld, presentado por Filmika Galaika.
Outros 25.000 euros distribúense a partes iguais entre cinco propostas de escrita individual de guión. Os títulos subvencionados son Anguías, de Nuria Mosqueira Varela; Os días calados do señor Steven, de César Souto Vilanova; Só (unidade mínima), de Antonio Chouza López; Dúas vellas, sete gatos, tres máquinas de coser, de Marta Pérez Pereiro, e O corpo aberto, de Ángeles Huerta.
Os 30.000 euros restantes repártense entre outros cinco proxectos de realización de curtametraxes, que percibirán 6.000 euros en cada caso. Trátase de Matria, de Álvaro Gago; A carta xeométrica, de Miguel Mariño; Exhalación, de Alberto Díaz López; Sendeiro, de Lucía Estévez, e Tódalas mulleres que coñezo, de Xiana Gómez-Díaz.
A relación completa de proxectos adxudicatarios e contías outorgadas ao abeiro desta convocatoria, publicada no Diario Oficial de Galicia o 23 de decembro de 2016, está dispoñible para a súa consulta a través das seccións de axudas e avisos da web www.agadic.gal.