Evento: Lei eterna

Lei Eterna parte dunha acción en medio urbano, unha performance participativa que tivo lugar na Praza da Quintana en Santiago de Compostela e que agora se reconverte para o seu formato expositivo na Fundación DIDAC. A exposición está asinada por Mery Pais.
Lei Eterna propón unha reflexión sobre as crenzas relixiosas de iguais e de contrarios para buscar un espazo conxunto de respecto pola diversidade. A exposición, comisariada pola directora artística da Fundación DIDAC Mónica Maneiro, funciona a través de diferentes rexistros visuais da acción performativa, un espazo sonoro realizado especialmente para a ocasión, fotografías, e unha instalación concibida a través das vestimentas das participantes na performance. Mery Pais busca a través desta proposta mergullar ao espectador participante nun espazo dende o que reflexionar sobre a necesidade de entrelazar culturas e derrubar estereotipos. A chamada á oración convértese nesta ocasión nunha chamada ao achegamento.