Nova: A Xunta ofrece ata decembro 203 novas funcións e concertos en 36 concellos da Rede Galega de Teatros e Auditorios

Santiago de Compostela, 29 de setembro de 2024

A Rede Galega de Teatros e Auditorios, circuíto de exhibición de espectáculos xestionado pola Xunta e as administracións locais adheridas, ofrece ata decembro 203 funcións en 36 concellos. Esta carteleira, de ámbito profesional e maioritariamente de produción galega, está cofinanciada pola Consellería de Cultura, Lingua e Xuventude con preto de 2M€ para todo o ano 2024, no que en total se levarán a cabo 555 actuacións de teatro, danza, maxia, circo e música en máis de 40 localidades. Este investimento destínase integramente á contratación das 172 formacións artísticas participantes na programación.

O novo período de actividade trimestral está conformado por 192 representacións escénicas de 87 espectáculos (deles, 58 están dirixidos a público familiar, haberá 10 funcións de danza, sete de circo e seis de maxia) a cargo de 71 compañías e 11 concertos de 9 formacións musicais.

Novidades escénicas

A Rede Galega de Teatros e Auditorios está a ofrecer as novas propostas escénicas de diferentes compañías. Así, Sarabela Teatro está a realizar xa 12 funcións coa súa nova produción, A cincenta que non quería comer perdices, inspirada no conto de Nunila López Salamero sobre os roles de xénero e como rachar con eles; en tanto que Amorodio Teatro presentará no Auditorio Municipal de Vigo o 12 de outubro Cortello de amor, unha comedia física e de enredo, con banda sonora orixinal de Grande Amore.

Outra das novidades será As gardiás, a cargo de Teatro de Ningures e sobre a loita das traballadoras da industria téxtil, que chegará a Cangas o 9 de novembro; mentres, As Pontes de García Rodríguez recibirá o 16 de novembro a última produción de Nova Galega de Danza, Dique, coa que a compañía recupera a historia esquecida das máis de 200 mulleres que traballaron na construción do Dique da Campá de Ferrol entre 1874 e 1879, a través dun diálogo entre danza a contemporánea e a tradicional que coproduce a Xunta de Galicia a través do Centro Coreográfico Galego.

Dentro dos espectáculos para público familiar, Redrum Teatro, levará a súa nova montaxe, Os contos de Lobicán, o 20 de outubro a Vigo e o 24 de novembro a Pontevedra cunha proposta que parte do texto co que Eva Mejuto obtivo en 2022 o premio Barriga Verde de textos para teatro de monicreques, na modalidade de público infantil, convocado pola Xunta. Enfocada tamén a un público máis amplo, Elefante Elegante presenta a peza de teatro xestual Kyoki. Será unha das compañías con maior presenza na Rede ao contar con nove funcións deste espectáculo, aínda que é Sarabela a que lidera o número de representacións de outono con 12 funcións de tres montaxes diferentes: O dragón de ouro, Made in Galicia e a mencionada A Cincenta que non quería comer perdices.

Variedade de propostas

As compañías Talía Teatro e ButacaZero tamén disporán de nove funcións en distintos escenarios. ButacaZero realizará sete da súa última montaxe O único que verdadeiramente quixen toda a vida ser delgada e dúas de Iribarne; mentres que Talía Teatro representará cinco de Desexo e catro de Unha inimiga do pobo.

Pola súa banda, Contraproducións ten programados oito pases repartidos entre os espectáculos O mundo está roto pero pódese camiñar, Apaga o candil e Entrega en man; e a compañía Os Náufragos xirará con Hugo, Noso e Bulebule a un total de sete espazos.

Entre as propostas que veñen de fóra de Galicia, Entrecajas, a montaxe de Teatro Paraíso premiada este ano como mellor espectáculo de clown na Fetén, a Feira Internacional de Artes Escénicas para Nenos, Nenas e Familias de Xixón, ten programadas cinco funcións da Rede ata final de ano.

No apartado de música, os concertos de Budiño o 19 de outubro en Arteixo, de Caamaño&Ameixeiras o 7 de decembro en Cee ou de De vacas o 9 de novembro en Narón son algunhas das vindeiras citas que tamén chegarán ao público nos próximos meses a través da Rede Galega de Teatros e Auditorios.