Equipamento: Auditorio da Escola de Altos Estudos Musicais de Galicia

Con forma de cubo e fachada en granito rugoso de Mondariz, o inmoble conta cun total de 1.700 metros cadrados de superficie total construída. Esta distribúese en cinco niveis máis cuberta, e reúne todas as condicións desexables para satisfacer as necesidades propias dun centro destas características no que respecta á súa distribución e acondicionamento. Ademais, sitúase moi preto do Auditorio de Galicia, sede da Real Filharmonía de Galicia e da propia escola durante os seus primeiros anos de existencia. A súa construción e equipamento foron financiados polo Consorcio da Cidade de Santiago de Compostela.

No proxecto, publicado en recoñecidas revistas especializadas e galardoado con diversos premios, tivéronse moi en conta os requerimentos acústicos. Así, as salas con maiores necesidades neste senso sitúanse nun baseamento de formigón soterrado, que conforma o asento do edificio. No soto sitúanse, pois, o auditorio de 226,6 metros cadrados, o laboratorio de electroacústica e gravación e a aula de percusión. O resto das aulas diminúen en tamaño e carácter público canto máis elevado sexa o andar no que se sitúan.