Evento: Peza do mes: Aixola de seixo. Outeiro de Cavaladre (Muíños, Ourense)

A presentación pública terá lugar o 9 de outubro ás 20:00 h, na sala de exposicións "Escolma de escultura", con entrada libre.

Como cada mes, o Museo escolle algunha peza de entre os seus fondos (neste caso, dos arqueolóxicos) para ser tratada de xeito pormenorizado e darlle maior visibilidade, afondando no seu contexto e características, datas, filiacións, etc., e reforzar así o seu valor.

As manifestacións megalíticas e tumularias da Baixa Limia son ben coñecidas gracias ós traballos do autor da presente «peza do mes», quen ten dirixido escavacións e prospeccións no espazo do parque natural da Baixa Limia-Serra do Xures. Precisamente foi no transcurso dunha prospección arqueolóxica no que se ten producido o achado na superficie dun dos túmulos do Outeiro de Cavaladre (Muíños, Ourense) dunha aixola de seixo (aixola de seixo da mámoa M4).

Que se trate dunha aixola e feita sobre seixo, aumenta o interese desta peza, xa que, por unha banda, estas son pezas escasas no rexistro galego, e por outra, a súa elaboración en seixo, xa que é o segundo caso coñecido no noroeste ata de agora.

Funcionalmente, empregaríanse no traballo da madeira: labores de deforestación, construción de valados, cabanas, mangos para as ferramentas; así como se usarían en labores agrícolas como a sementeira e outros coidados da terra de labor..

A publicación virtual sobre esta peza está dispoñible neste enlace do Museo Arqueolóxico de Ourense, onde se pode afondar sobre as súas características, cunha descrición pormenorizada, a reflexión sobre as súas funcionalidades, a súa clasificación, ou o contexto arqueolóxico no que se levou a cabo o achado, nun estudio a cargo, neste caso, de José María Eguileta Franco.