Evento: Xosé Vizoso: deseñador de Sargadelos

O 30 de xaneiro celebramos o Día da Ilustración, unha efeméride instituída en 2014 como parte do Calendario do Libro e da Lectura, coincidindo coa data de nacemento de Castelao. A celebración ten como obxectivo recoñecer o papel dos ilustradores no tecido cultural de Galicia. Este ano a efeméride adícase a Xosé Vizoso (Mondoñedo, 1950) sumándose así á lista de ilustres homenaxeados: Camilo Díaz Baliño, Álvaro Cebreiro, Federico Ribas ou Chichi Campos... aínda que cunha particularidade: o recoñecemento ao autor de Mondoñedo é o primeiro que se fai en vida, fronte a edicións anteriores centradas en reivindicar referentes históricos e pioneiros nesta disciplina. 

Xosé Vizoso é todo un referente do deseño gráfico en Galicia, e así o constatan as catro décadas deseñando para a marca Sargadelos. Artista polifacético e prolífico, ademais da súa traxectoria en Sargadelos, Vizoso ten unha importante obra como ilustrador, realizando máis de 300 cubertas para Edicións do Castro e outras editoriais dentro e fóra de Galicia. A súa técnica foi evolucionando co tempo desde imaxes máis abstractas e cheas de xeometrías onde se mesturan as figuaras e os fondos, ata ilustracións máis espontáneas onde importa o trazo e a simplicidade do bosquexo. 

Outra das facetas artísticas é como cartelista, cunha obra que supera os 130 carteis. Carteis para múltiples feiras e festas populares, profanas e relixiosas, xornadas, seminarios, romaxes, concursos, trofeos deportivos, certames e representacións teatrais, feiras de artesanía. Deseñou tamén o cartel conmemorativo do 100 aniversario de R.C. Celta de Vigo.

A exposición, que se pode visitar no primeiro andar, recolle exempos da súa extensa obra como deseñador, ilustrador e cartelista.