Evento: Habitación Vudú

Habitación Vudú é unha banda de rock-indie da Limia (Ourense) na que atopamos a José Freiría (guitarra e voz), Xusto Freiría (batería), Rubén Seoane (baixo) e Isidro Vidal (guitarras). O proxecto nace sobre 2011 despois de que os irmáns Xusto e ,José Freiría, ligados á música dende sempre, decidisen dar orde a unha serie de ideas que tiñan compostas. Coa incorporación de Rubén Seoane no baixo, establécese a base de Habitación Vudú que foi tomando forma con diferentes incorporacións ao longo dos anos.

Toman o seu nome do disco de The Rolling Stones ‘Voodoo Lounge’ (Virgin, 1994), e na primavera de 2015 gravan o seu primeiro EP, Flores Falsas, en Esteroarte Estudos de Vigo, coa producción de Luis Antelo e contando coa colaboración do recoñecido músico Pablo Novoa, entre outros. No verán de 2016 Habitación Vudú consegue consolidar a súa traxectoria, formando parte do cartel do festival Cultura Quente de Caldas de Reis (Pontevedra) e son elixidos para abrir o concerto de The Gift en Montalegre (Portugal). A xira de presentación de Flores Falsas continúa por todo o país durante 2017. Entre concerto e concerto, o grupo aproveita para levar a cabo gravacións en varias sesións de estudo, dando forma ao segundo EP de Habitación Vudú, No Aire, producido por Luis Antelo. Este novo traballo móstranos un son fresco, auténtico, de cadencia alternativa e alma rockeira que se plasma en 5 cortes que cobran vida en 2018, a través do seu primeiro sinxelo, A Estafa, do que tamén se publica un videoclip.

Comezan xira no Festival Portamérica 2018, un dos máximos expoñentes da música independente nacional e internacional do momento, xunto a artistas da talla de Izal, Vetusta Morla ou Xoel López. En 2019 Habitación Vudú culmina a súa xira actuando no Festival de la Luz, outro dos eventos máis consolidados da xeografía galega, onde ten a honra de compartir cartel con artistas como Luz Casal, Celtas Cortos, Mikel Erentxun, Cepeda, Orquestra Mondragón..

Aproveitando a pandemia para composición, en 2021, volven á carga con outro sinxelo titulado O Circo. En 2022 logran un dos seus máis importantes fitos ao telonear en Ourense ao grupo británico Placebo.

Recentemente veñen de publicar o seu último tema que leva por título Pozo Quente, no que dan a súa particular visión da vida na cidade de Ourense.

O seu futuro máis próximo pasa por entrar no estudo ás ordes de Juan de Dios Martín (produtor de grupos como Deluxe, Amaral entre outros).