Evento: Xoán Piñon

Xoán Piñón é un dos nosos máis grandes fotógrafos, con toda unha vida de dedicación e recoñecemento.

Moitas das súas imaxes son iconas que recoñecemos, aínda cando en ocasións ignoremos a súa autoría. Traballou case todos os campos da fotografía ao longo de máis de corenta anos de traballo. Evolucionou, empuxado polos avances técnicos pero moito máis polo seu propio concepto do medio.

Presentou en diversas ocasións as súas obras, pero nunca antes como agora. Volve ao Kiosco Alfonso, onde xa participou en colectivas a comezos dos oitenta, pero agora cunha exposición na que, sen pretender ser antolóxica, móstranos as imaxes das que sente especialmente satisfeito. Son once series e 138 fotografías que abarcan cronoloxicamente desde 1977 ata o ano 2012. Aquí están representados os seus traballos para o cinema, a moda... ,así como a súa visión do Caurel, as súas homenaxes á arte galega, tamén as súas obras de estudo e esa visión tan persoal do seu mundo, da súa contorna case a modo de crónica dunha época.