Nova: Rueda pon en valor o vigor e o dinamismo actual do sector cultural galego e a relevancia da súa proxección exterior
15/03/2023
Rueda pon en valor o vigor e o dinamismo actual do sector cultural galego e a relevancia da súa proxección exterior
Felicita os recoñecidos no día grande da cultura galega e destaca os grandes éxitos que están a colleitar os autores en diferentes disciplinas no panorama nacional e internacional
Subliña que o sector cultural supón o 3 % do PIB galego e un 3,2 % do emprego, cun incremento dun 65 % no número de traballadores desde o ano 2011 malia sufrir a crise provocada pola pandemia
Destaca as novas estratexias e normativas para a promoción da cultura nas que traballa o Goberno galego e as grandes citas que permitirán ao longo deste ano reafirmar o orgullo polas distintas expresións propias da arte e da cultura
O presidente da Xunta, Alfonso Rueda, puxo hoxe en valor o vigor e o dinamismo actual do sector cultural galego e a relevancia da súa proxección exterior. Na entrega dos Premios da Cultura Galega, aos que asistiu acompañado polo conselleiro de Cultura, Educación, Formación Profesional e Universidades, Román Rodríguez, o titular do Goberno galego felicitou os recoñecidos no día grande da cultura galega e destacou os grandes éxitos que están a colleitar os autores en diferentes disciplinas no panorama nacional e internacional.
Alfonso Rueda chamou a atención tamén sobre a resistencia do sector malia vir de atravesar dous anos moi difíciles polas consecuencias da pandemia, que paralizou boa parte das expresións culturais, de tal maneira que non só se recuperou o dinamismo, favorecido por acontecementos como o Xacobeo, senón que se constatou unha extraordinaria proxección exterior con multitude de exemplos, como o éxito inigualable das Tanxugueiras, o recoñecemento á película As bestas nos Premios Goya ou a concesión do Premio Nacional de Narrativa a Marilar Alexandre, o Premio Nacional de Poesía Joven Miguel Hernández a Ismael Ramos, e o Premio Lazarillo de Creación Literaria en Literatura Infantil y Juvenil a Ledicia Costas.
O presidente da Xunta asegurou que “o rexurdimento cultural galego non ten límites” e que o Goberno autonómico seguirá da man dos seus intérpretes e promotores con estratexias e normativas que permitan seguir promocionando a cultura, como o Plan Xeración Cultura -que recolle dous novos textos lexislativos, seis plans específicos de apoio e 57 accións, cun investimento de 34 millóns de euros este ano- ou a Lei de cultura inclusiva e accesible de Galicia e a Lei de cultura dixital de Galicia, que se prevé aprobar ambas as dúas ao longo deste ano.
Subliñou, ademais, as efemérides que no 2023 permitirán seguir traballando sobre a herdanza recibida, como o Día das Letras Galegas que conmemorará a figura de Francisco Fernández del Riego, o centenario do Seminario de Estudos Galegos, os 50 anos da morte de Pablo Picasso, o centenario da morte de Manuel Murguía, os 50 anos do pasamento de Urbano Lugrís, a conmemoración dun século do nacemento do poeta Carlos Oroza ou o centenario da arquiveira Olga Gallego.
Os premiados e a súa pegada
No caso de Marica Campo, por achegar as palabras que conectan coa mocidade transmitindo valores de feminismo, ecoloxía e solidariedade.
A María Victoria Carballo-Calero pola súa constante investigación e a súa divulgación sen acougo sobre as diferentes maneiras que ten o pobo de xerar cultura.
A Melania Cruz pola súa particular visión de Galicia no teatro e no audiovisual.