Nova: Arranca a segunda edición da aceleradora musical da Xunta para impulsar as carreiras de 12 novos talentos

Santiago de Compostela, 14 de xaneiro de 2024

A Cidade da Cultura de Galicia, en Santiago de Compostela, foi o escenario do inicio da actividade da segunda edición de Sonemerxente, a aceleradora musical a través da que a Xunta busca impulsar o despegue de carreiras de novos talentos con especial potencial de proxección. Abril, Amoebo, Candela Liste, Catuxa Salom, Eris Mackenzie, Filloas, French Riviera, Futuro Alcalde, Habló Pablo, Javier Lago, Marián e Verter GZ son os 12 proxectos seleccionados para esta nova xeira da iniciativa, xestionada pola Consellería de Cultura, Educación, FP e Universidades coa colaboración da Fundación Paideia Galiza.

Os seus integrantes déronse cita no Gaiás para participar na primeira sesión formativa conxunta, centrada na autoavaliación das fortalezas e da capacidade de mellora das súas respectivas propostas. O director da Axencia Galega das Industrias Culturais, Jacobo Sutil, e mais o vicepresidente de Paideia, Guillermo Vergara, foron os encargados de darlles a benvida e felicitalos por entrar a formar parte deste programa de aceleración, para o que foron seleccionados entre unha trintena de propostas recibidas.

Equipo docente de primeiro nivel

O representante da Xunta de Galicia animounos, así mesmo, a sacar o máximo proveito das ferramentas que o equipo docente, integrado por profesionais de primeiro nivel, porá á súa disposición para lograr un salto cualitativo nas súas traxectorias, así como para facilitar o seu acceso ao mercado musical e ao financiamento.

En concreto, esta primeira xornada de traballo estivo impartida pola socióloga e facilitadora Susana García Artés, xunto á que os participantes levaron a cabo unha análise sobre os aspectos máis ou menos positivos do seu proxecto, identificando áreas específicas que requiren maior orientación e apoio para estimular o seu desenvolvemento.

Esta nova entrega de Sonemerxente, dotada con 240.000 euros e coa contribución ao seu financiamento dos fondos do Mecanismo de Recuperación e Resiliencia da Unión Europea, seguirá a estrutura de desenvolvemento en dúas fases que xa se levou a cabo a edición de 2023.

A primeira delas consiste nunha serie de consultarías individualizadas e grupais, tanto presenciais como telemáticas, que inclúen diferentes accións de mentorización co foco posto na proposta artística, produción, promoción, comercialización e modelo de negocio. En concreto, o programa de formación grupal articularase arredor do discurso como elemento esencial para a conexión co público, a posta en escena, a produción de temas musicais e de videoclips, a estratexia no negocio da música en directo e o benestar emocional dos artistas.

A segunda fase dedicarase á promoción e difusión dos proxectos a través da súa participación en circuítos de concertos, festivais e mercados profesionais, dentro e fóra de Galicia, ademais de nun evento final de presentación das propostas.