Nova: José López inaugura a Feira do Libro de Santiago de Compostela, a segunda cita dun circuíto por 13 cidades e vilas de Galicia

Santiago de Compostela, 27 de abril de 2024

O conselleiro de Cultura, Lingua e Xuventude, José López Campos, inaugurou hoxe a Feira do Libro de Santiago de Compostela, a segunda das citas deste ano nun circuíto ao redor da lectura —que percorre 13 cidades e vilas das catro provincias de Galicia— e na cal estivo acompañado polo director xeral de Cultura, Anxo Lorenzo, e por Susana e María Gómez, irmá e nai de Luísa Villalta, respectivamente.

O conselleiro anunciou que, ata o vindeiro domingo 5 de maio, a alameda compostelá se vai consolidar como “un reclamo moi atractivo cara ao libro e á lectura”. Neste espazo aberto vanse localizar 17 expositores —un deles da Biblioteca Ánxel Casal— e  vanse artellar máis de 100 actividades; entre presentacións de libros, sinaturas e accións dinamizadoras da lectura.

López Campos incidiu na enorme satisfacción que lle supón que os primeiros actos como conselleiro de Cultura, Lingua e Xuventude estean vencellados con estas citas coa lectura por toda a Comunidade. Precisamente, fixo fincapé en que a Xunta lles dá unha “prioridade especial” ao libro e á lectura. “Queremos unha sociedade que encontre respostas nos distintos formatos en que se nos presentan hoxe”, afondou.

Expansión para a identidade e para a cultura

O titular de Cultura, Lingua e Xuventude puxo en valor que o libro serve de “vía de expansión” para a nosa identidade e para a nosa cultura. “Probablemente sexa o primeiro referente do que somos, do que creamos, do que pensamos e do que sentimos”, remarcou.

As feiras do Libro de Galicia están vencelladas coa programación que se está a desenvolver ao redor da celebración do Día Internacional do Libro (23 de abril). Neste senso, o conselleiro apuntou o feito de que se trata dunha “festa da lectura, do libro e da palabra” que anima a descubrir “facianas inacabables do pracer lector”, ademais de que serve para estar un “pouco máis preto” dos escritores e escritoras. E, en concreto, indicou a oportunidade que supón para achegarse ou mergullarse máis polo miúdo na obra da creadora a quen este ano se lle dedica o Día das Letras Galegas, Luísa Villalta.

Librarías, parte fundamental do comercio do libro en Galicia

O conselleiro tirou proveito desta cita coa lectura para salientar o papel das librarías, ás que erixiu como “parte fundamental” do comercio do libro en Galicia. Precisamente, subliñou que máis do 80 % das compras de libros que non son de texto que se realizan en Galicia se canalizan a través delas, á vez que puxo en valor o feito de que somos a segunda comunidade con máis establecementos libreiros por cada 100.000 habitantes.

Finalmente, o conselleiro rematou a súa intervención cun recoñecemento especial para a pregoeira da Feira do Libro de Santiago de Compostela, a poeta Lupe Gómez, quen chega a esta cita lectora con dous premios recentes: o Lueiro Rei de Poesía e o Internacional de poesía Carlos Oroza.

13 vilas e cidades en abril, maio, xullo e agosto

Santiago é a segunda das 13 citas co libro e a lectura que terán os galegos e galegas en diferentes vilas e cidades das catro provincias. Logo do paso por Ferrol, entre o 19 e o 21 de abril, súmase agora Santiago de Compostela, onde a feira estará ata o 5 de maio. Tras a capital galega, seguirán O Porriño, do 9 ao 12 de maio; e Lugo, do 13 ao 17 de maio.

Tamén haberá Feira do Libro na provincia de Ourense, do 5 ao 8 de xuño; en Redondela, do 13 ao 16 de xuño; Vigo, do 1 ao 7 de xullo; Ponteareas, do 11 ao 14 de xullo; e Rianxo, do 14 ao 27 dese mesmo mes. En agosto, a Feira do Libro estará tamén na Coruña, do 1 ao 10; Viveiro, do 12 ao 15; en Foz, do 16 ao 19; e en Monforte de Lemos, do 21 ao 24.