Nova: López Campos garante no Parlamento o compromiso da Xunta co fortalecemento dos vínculos lusófonos

Santiago de Compostela, 29 de maio de 2024

O conselleiro de Cultura, Lingua e Xuventude, José López Campos, garantiu hoxe no Parlamento de Galicia que o Goberno galego continuará desenvolvendo e fortalecendo os vínculos coa lusofonía. Fíxoo en resposta a unha interpelación no Pleno do Parlamento de Galicia, onde destacou o traballo que se está levando a cabo no seu departamento para “espremer ao máximo as oportunidades” que brindan o galego e o portugués. 

Neste senso, o representante autonómico de Cultura deu conta da “multitude de iniciativas” con “enorme resultado de éxito” que ten desenvolvido a Xunta para o impulso destes vencellos, a través coñecida popularmente como Lei Paz Andrade, aprobada por unanimidade con este fin no Parlamento de Galicia en 2014. 

Precisamente no marco desta Lei, o conselleiro anunciou como actuación novidosa que a Xunta asinará proximamente un convenio co Instituto Camões para poder acreditar o nivel de coñecemento de portugués nos centros educativos de Galicia. Sobre isto, López Campos aclarou que, ata o momento, xa se teñen feito algunhas probas piloto por medio do programa Camões Junior en institutos de Educación secundaria, como o Alonso Ríos (Tomiño), o de Milladoiro (Ames); ou o San Clemente (Santiago de Compostela).

O Observatorio Galego da Lusofonía, en vindeiras datas

Ademais, o responsable da Xunta de Lingua, Cultura e Xuventude tamén adiantou que en vindeiras datas porase en marcha o Observatorio Galego da Lusofonía, cuxo decreto de creación xa se aprobou no Consello da Xunta. Este órgano, tal e como explicou, terá capacidade de asesoramento ao Goberno, de formular plans de acción e de programar actividades de coñecemento, intercambio e programación neste eido.

López Campos cualificou de “moi boa nova” a posta en marcha deste Observatorio para seguir traballando en prol dunha lingua e dunha cultura máis amplas co obxecto de “analizar o traballo feito e debuxar un futuro prometedor”.

Iniciativas innovadoras ao longo desta última década

Na súa intervención, o conselleiro sumou estas dúas novas iniciativas ás “innovadoras” que ao longo desta década o Goberno galego ten desenvolvido e que, segundo asegurou, teñen acadado “unha importante evolución” na percepción que a sociedade galega ten do portugués.

Neste senso, atribuíu a estas iniciativas os “avances históricos” que se están a acadar respecto ao aproveitamento dos vínculos coa lusofonía. En concreto, referiuse á inclusión de España como Estado observador asociado da Comunidade de Países de Lingua Portuguesa ou á celebración en Santiago de Compostela do Congreso Internacional sobre Procesamento Computacional do Portugués (PROPOR) 2024, o máis importante do mundo en procesamento da lingua portuguesa e Intelixencia Artificial, e que saíu dun país lusófono por primeira vez na historia.

Outros fitos acadados no marco deste compromiso, tal e como citou, son a posibilidade de estudar portugués en todos aqueles centros nos que exista demanda e que actualmente xa fan máis de 5.000 alumnos, ou o apoio ao proxecto Ponte...nas Ondas! no seu recoñecemento pola Unesco como Patrimonio Cultural Inmaterial.