Nova: A Xunta comparte con Asociacións de Camiños de Santiago os seguintes pasos da candidatura da Ribeira Sacra a Patrimonio Mundial

O Saviñao (Lugo), 8 de xuño de 2024

A directora xeral de Patrimonio, María del Carmén Martínez Insua, participou hoxe no concello lucense do Saviñao nunha xornada con Asociacións de Camiños a Santiago pola Ribeira Sacra coas que compartiu os seguintes pasos da candidatura Paisaxe da auga: Ribeira Sacra a Patrimonio Mundial, tras a decisión do Consello do Patrimonio Histórico de que sexa a proposta de España para a súa remisión a Unesco. 

Nestas xornadas divulgativas dedicadas aos 25 anos da Asociación de Camiños a Santiago pola Ribeira Sacra, a representante da Consellería de Cultura, Lingua e Xuventude aproveitou para agradecer o apoio que a candidatura recibiu durante este proceso por parte destas entidades, ao igual que doutras de carácter civil e institucional.

Neste senso, explicou que, tras a aprobación do Consello de Patrimonio Histórico, a candidatura da Ribeira Sacra entra nunha nova fase na que é preciso seguir “traballando como ata agora” para lograr a inclusión na Lista de Patrimonio da Humanidade, xa que a proposta será abordada en 2026 no Comité do Patrimonio Mundial da Unesco. 

Vindeiros pasos ata o Comité do Patrimonio Mundial da Unesco

Martínez Ínsua explicou que o Goberno galego traballa nunha nova fase na que, ao longo do ano, o equipo técnico redactor, en colaboración co Ministerio de Cultura, deberán completar o expediente desde o punto de vista formal co fin de cumprir coas directrices operativas da Unesco. 

Posteriormente, o informe será presentado no Centro de Patrimonio Mundial da Unesco de París en febreiro de 2025, onde será avaliado polos órganos consultivos antes da súa valoración no Consello do Patrimonio Histórico, que ten prevista a súa sesión para o segundo semestre do ano 2026.