Nova: O circuíto da Xunta ‘Cultura no Camiño’ segue o seu percorrido por Galicia con 140 actuacións en agosto

Santiago de Compostela, 31 de xullo de 2024

Cultura no Camiño, o circuíto de espectáculos promovido pola Xunta de Galicia en 88 concellos das rutas xacobeas, continúa o seu percorrido ata finais de agosto con 140 novas citas escénicas e musicais previstas durante todo o mes. Completarase así a 12ª edición desta iniciativa, que arrancou o pasado 15 de xuño para ofrecer este verán máis de 300 actuacións de circo, danza, maxia, música e teatro a cargo de 140 formacións artísticas galegas.

A carteleira de Cultura no Camiño, que se enmarca na campaña CulturON da Consellería de Cultura, Lingua e Xuventude, caracterízase polo seu enfoque familiar, para todas as idades e gustos, desenvolvendo a meirande parte das representacións ao aire libre. A programación coa que arranca o mes de agosto dá boa conta da ampla variedade de xéneros e estilos que conforman o circuíto.

Así, a praza de Galicia en Arzúa será o escenario dun concerto de MJ Pérez mañá, xoves, xornada na que o público de Neda poderá gozar do espectáculo de teatro infantil Kori, de Kocorico, de Galitoon, e Leti da Taberna protagonizará o monólogo Enredadas en Vilar de Barrio.

O venres 2 será a quenda da música de Agoraphobia en Ames, Festicultores Troupe en Abadín, Cé Orquestra Pantasma en Vilar de Barrio e Clara Pino e Pablo Vidal no Grove. Tamén haberá propostas de maxia e teatro para todas as idades con Inefable, de Dani Polo, en Begonte; Conto para escoitar mentres bailamos un vals, de Catoxo, en Mondoñedo; Hoxe si!, de Sempre Arriba, en Allariz; Animais artistas e outras cousiñas, de Negro López, en Dozón, e Animacreques, de Cía. Catropés, en Sanxenxo.

Xa na fin de semana, o sábado 3 terán lugar os concertos de De Ninghures en Negreira, Ailá no Pino e Catuxa Salom en Vilalba. Ese mesmo día, a maxia, o humor e o circo correrán a cargo do Mago Charlangas en Portomarín, Raquel Queizás en Ribas de Sil, Kote Malabar en Vilar de Barrio, Estrelas Máxicas en Xinzo de Limia e Dani García en Xunqueira de Ambía. Ademais, o concello de Miño acollerá o domingo 4 unha dobre sesión matutina de teatro familiar con Kinetiko, de Trécola, e Trashumancia sonora, de Paporrubio.

As actividades de Cultura no Camiño nesta primeira fin de semana de agosto achegan outras propostas familiares como Des(a)fiada. Tecendo música, fiando memoria, de Zoelas, en Friol; Maxia sen trucos, de A Maxia de Ian e Elisa, en Vilar de Barrio; Henriko o feiticeiro, de Simplemente Enricco, na Illa de Arousa; Errantes, de Troula de Animación, en Catoira, e Rock and Magic, do Mago Teto en Mos.

Reforzo da contratación artística galega

Na proposta global deste programa para este verán atópanse 93 concertos, 45 funcións de maxia, 55 actividades de novo circo e 110 representacións de artes escénicas, sempre de acceso gratuíto. Ademais, o circuíto funciona como escaparate da produción cultural galega, mobilizando arredor de 500.000 euros en contratacións artísticas a través do investimento da Xunta e dos concellos implicados.

Así, este programa de dinamización dos municipios galegos do Camiño de Santiago mantén o dobre obxectivo co que botara a andar en 2013: por unha banda, descentralizar a oferta escénica e musical galega e por outra, favorecer a contratación de espectáculos profesionais producidos na nosa Comunidade.

A programación completa pode consultarse na Axenda da web de Cultura de Galicia.