Nova: A delegada territorial da Xunta en Ferrol pon en valor a mirada dos fotoxornalistas galegos na inauguración da exposición ‘A Galicia inédita’

Ferrol, 5 de setembro de 2024

A delegada territorial da Xunta en Ferrol, Martina Aneiros, participou esta mañá no centro cultural Torrente Ballester na inauguración da mostra itinerante A Galicia inédita, unha ollada diferente do fotoxornalismo galego, promovida pola Asociación de Periodistas de Galicia e o Colectivo Profesional de Fotoperiodistas de Galicia, co apoio da Consellería de Cultura, Lingua e Xuventude.

A mostra reúne un total de 73 instantáneas de fotógrafos de prensa que traballan na comunidade, acompañadas por lendas de corte literario elaboradas por xornalistas. Tras percorrer as cidades de Santiago, A Coruña, Pontevedra e Ourense chega a Ferrol onde poderá visitarse ata o 29 de setembro (de martes a sábados de once a dúas e de sete a nove e os domingos de once a dúas).

A delegada territorial cualificou a mostra como unha “homenaxe a esa capacidade dos fotoxornalistas de non só contar os feitos, senón tamén de ofrecernos novas perspectivas, novos ángulos e, en definitiva, novas formas de entender quen somos e cara a onde imos”.

Aneiros felicitou aos promotores da iniciativa e gabou o traballo dos profesionais que participan na exposición, cunha mención especial aos fotoxornalistas ferroláns, sobre cuxo traballo reflexionou, “contribúe a enriquecer o imaxinario colectivo galego e, ao mesmo tempo, nos desafía a non conformarnos coas imaxes habituais, a buscar sempre esa ollada diferente que nos permita ver Galicia con ollos novos”.