Nova: López Campos anuncia que a Xunta actuará nos xacementos da Illa de Tambo para a posta en valor do seu patrimonio

Poio (Pontevedra), 13 de setembro 2024

O conselleiro de Cultura, Lingua e Xuventude, José López Campos, anunciou hoxe que a Xunta de Galicia actuará nos xacementos da Illa de Tambo, pertencente ao concello pontevedrés de Poio, co obxecto de “recuperar e pór en valor o seu significativo patrimonio cultural”. Fíxoo durante a visita que realizou a este enclave natural, do que defendeu a súa “preservación e conservación” por parte da Administración galega.

No seu percorrido pola illa, aberta ao público de maneira controlada fai dous anos, López Campos fixo fincapé no “importante valor deste espazo único” e incidiu no compromiso do Goberno galego coa recuperación deste tipo de contornas, “que contan con importantes bens patrimoniais”.

Restos arqueolóxicos na Illa de Tambo

Precisamente, tirou proveito desta visita para adiantar que está prevista para o vindeiro ano 2025 levar a cabo unha serie de sondaxes nos restos arqueolóxicos de Tambo. Segundo precisou, o obxecto é “investigar sobre o xacemento e recompilar máis información”.

Ao respecto, lembrou que xa durante o pasado ano a Dirección Xeral de Patrimonio estivo a realizar escavacións. Nelas atoparon pezas e elementos patrimoniais que poderían corresponderse cunha posible capela, polo que o conselleiro incidiu en que ”se seguirá a traballar para profundar no estudo e catalogación dos bens atopados nestes achados”.

Os restos arqueolóxicos visitados hoxe forman parte dun asentamento situado no monte central da illa. Consta dun recinto principal que ocupa a parte máis elevada, cunha planta circular e afloramentos de batolitos graníticos. Está defendido de forma natural e non se teñen atopado, ata o momento, restos de construción.

Campaña de sensibilización de coidado do patrimonio

O conselleiro enmarcou estas actuacións no compromiso da Administración autonómica co adecuación do castro. Nesta liña, tendeu a man para catalogar os bens patrimoniais que contén a illa e apuntou que se tramitará a súa declaración como Espazo Natural de Interese Local cando sexa presentada polo concello.

López Campos lembrou tamén a campaña Que siga contando a nosa historia, que a Consellería de Cultura, Lingua e Xuventude ten en marcha para fomentar entre a sociedade a importancia de coidar o patrimonio, impulsar o coñecemento dos bens e incentivar boas prácticas e iniciativas de preservación.

López Campos fixo fincapé en que con este tipo de campañas preténdese reivindicar “o inmenso valor que ten na configuración da nosa historia e identidade para as xeracións actuais e futuras”. En concreto, referiuse aos obxectivos de “fomentar a concienciación da cidadanía; impulsar o coñecemento sobre estes bens; e incentivar as boas prácticas e iniciativas de preservación que permitan que un dos maiores tesouros de Galicia sexa legado ás xeracións vindeiras nas mellores condicións”.