Nova: A Biblioteca Pública da Xunta acolle unha mostra de carteis de cine cubano de Eduardo Muñoz no marco da 46ª Semana de Cine de Lugo

Lugo, 23 de setembro de 2024

A Biblioteca Pública da Xunta en Lugo abriu esta tarde unha exposición de carteis de cine cubano de Eduardo Muñoz Bachs no marco da 46ª Semana de Cine. O delegado territorial, Javier Arias, participou na inauguración xunto cos organizadores, o grupo cinematográfico Fonmiñá.

A mostra poderá visitarse ata o 12 de outubro. Achegará aos lucenses o traballo deste  deseñador e ilustrador nacido en Valencia en 1937 e que se trasladou a Cuba moi novo. A súa obra é unha referencia na historia da gráfica cubana, sobre todo no que respecta ao cinema, para o que realizou máis de mil carteis ao longo da súa traxectoria.

A programación da Semana de Cine inclúe 147 películas que poderán verse entre hoxe e o domingo en cinco espazos da cidade. Dúas das sedes serán a Biblioteca Pública e a Delegación Territorial da Xunta, que acollerán os ciclos adicados ao cinema español inédito e ás producións galegas, respectivamente.