Nova: A Xunta trae este domingo ao teatro Jofre a terceira edición da gala internacional de maxia ‘Galicia Ilusiona’

Ferrol, 8 de outubro de 2024

A delegada territorial da Xunta en Ferrol, Martina Aneiros, acompañada do concelleiro de Festas do Concello de Ferrol, Arán López, presentou esta mañá na Delegación Territorial unha nova edición da gala internacional de maxia Galicia Ilusiona que terá lugar o vindeiro domingo 13 de outubro no teatro Jofre e que, un ano máis, conta co apoio de Turismo de Galicia.

Durante a presentación os directores da gala, Dani Polo e Pedro Bugarín, deron conta do elenco de artistas de talla mundial que estarán na cita como Jerome Murat, considerado o mellor mimo do mundo; Néstor Hato, mago francés considerado o mestre da manipulación; Lore Lavan, maga arxentina especialista en mesturar poesía e maxia, ou Ki Moon Do, ilusionista coreano que se mete no papel dun director de orquestra. Xunto a eles están sobre o escenario do teatro Jofre os dúos formados por Manolo Costa e Mindanguillo e Ramó and Alegría, todos eles presentados polo Mago Murphy.

A delegada territorial destacou a calidade do evento “que leva alcanzado os 70.000 espectadores nas dúas primeiras edicións” e destacou o grande interese suscitado no público “como ben amosa o feito de que as entradas para calquera das dúas sesións (a das 18,00 e a das 20,30 horas) xa estean practicamente esgotadas”, dixo.

“Esta gala que percorre as principais cidades galegas é un exemplo de como, a través da colaboración entre institucións e o sector cultural e turístico, pódense crear espazos que supoñan un foco de atracción de visitantes e seareiros á maxia”, puntualizou Aneiros que tamén puxo en valor o traballo dos organizadores e boa disposición do Concello de Ferrol á hora de albergar este tipo de eventos.

As entradas para acudir á gala internacional de maxia Galicia Ilusiona poden adquirirse a través da web oficial do evento.