Nova: David Lynch, Frans van de Staak e Albertina Carri protagonizan o mes de abril na Filmoteca de Galicia

 A Coruña, 31 de marzo de 2025

A Filmoteca de Galicia encara abril cunha ampla renovación da súa carteleira mensual, no marco da que pon en marcha tres novos ciclos dedicados a David Lynch, Frans van de Staak e Albertina Carri.

Mañá mesmo dá comezo na Sala José Sellier da Coruña o primeiro deles, a través do que a cinemateca da Xunta lle rende homenaxe ao cineasta estadounidense David Lynch, falecido o pasado mes xaneiro. Esta completa retrospectiva da obra dun dos grandes renovadores da linguaxe cinematográfica do último medio século estenderase ata mediados de maio para recuperar todas as súas longametraxes, así como unha escolma das súas curtas máis representativas.

A primeira das sesións será precisamente a conformada polas curtas Six Men Getting Sick, The Alphabet, The Grandmother, The Amputee e Lumière y compañía, que poderán verse tamén o venres 4, mentres que o mércores 2 proxectarase a súa primeira longa, Cabeza borradora, na que xa se aprecia o gusto de Lynch polos universos sobrenaturais en convivencia co cotián, que van definir boa parte da súa filmografía.

Ademais de Cabeza borradora, que tamén terá un segundo pase o vindeiro venres, o público terá a oportunidade de volver ver en pantalla grande títulos como El hombre elefante (días 8 e 9), Twin Peaks: fuego camina conmigo (días 10 e 11), Carretera perdida (días 16 e 22), Una historia verdadera (días 23 e 24), Mulholland Drive (días 25 e 26) e Terciopelo azul (días 29 e 30).

Presentación de Manuel Asín

Frans van de Staak: la palabra en archipiélago é o segundo dos ciclos programados para abril, neste caso en colaboración co Festival Internacional de Cine Documental de Navarra Punto de Vista, o Eye Film Museum e a Embaixada dos Países Baixos en España. Manuel Asín, director do certame pamplonés, estará na sede da Filmoteca de Galicia o vindeiro xoves 3 para presentar o foco dedicado a un dos máis singulares cineastas da escena experimental holandesa que, a pesar da admiración que espertou en determinados círculos artísticos, continúa a ser un gran descoñecido a nivel internacional.

Este achegamento á súa filmografía, baixo o comisariado do propio Asín e de Carlos Saldaña, condénsase en seis sesións que recollen 11 longas e curtametraxes agrupadas segundo a súa relación temática ou cronolóxica.

Xa a mediados de abril, comeza na sala José Sellier o ciclo Albertina Carri: Territorios mutantes e cartografías queer, que presenta en Galicia boa parte dos traballos desta cineasta arxentina, unha das autoras máis irreverentes e a contracorrente do seu país. Este especial entronca, ademais, co programa Close-Up: Cine e perspectiva de xénero, que a Filmoteca de Galicia desenvolve desde o pasado mes de outubro e no marco do que o 15 de abril Albertina Carri manterá un encontro co público para falar sobre a súa traxectoria e presentar a súa última película, ¡Caigan las rosas blancas!, seleccionada no Festival de Rotterdam e que supón a súa primeira estrea oficial en España.

Ademais, os días 11 e 16 de abril poderá verse a longametraxe coa que deu o salto ao panorama internacional: Los rubios, un ensaio autobiográfico que parte do seu trauma como filla de desaparecidos da ditadura militar para realizar un complexo retrato xeracional. A memoria histórica e a súa militancia queer son os temas centrais polos que transita a súa obra e que aparecen reflectidos tamén en varios dos filmes que se poderán ver na Coruña: Géminis (día 22), Las hijas del fuego (día 24) e Cuatreros (día 30).

Pablo Gil Retuerto, Jonas Mekas, Fritz Lang e Off Galicia

Fóra de serie, unha das seccións habituais da Filmoteca, ofrece mañá e o mércores o documental La marsellesa de los borrachos, de Pablo Gil Retuerto, que na súa primeira sesión será introducido polo cineasta galego Marcos Flórez, quen asina a montaxe deste traballo. Ademais, a cinemateca da Xunta acolle o mércores 23 a presentación do Caderno FICBUEU#5, dedicado a Jonas Mekas, coa participación da súa autora, Nieves Febrer, seguida da proxección dunha selección de curtas do cineasta.

A carteleira de abril complétase con novas entregas de Filmoteca Jr., dentro da que o día 12 se proxectará o clásico de Fritz Lang Los contrabandistas de Moonfleet, e Off Galicia, que, o día 29, ofrece o documental Lévame a idea. Este filme de Laura Varela, Iria Villares e Vanesa Siso reivindica desde unha óptica feminista o papel fundamental das mulleres na preservación da poesía, o canto e a cultura popular de Galicia.