Nova: O CGAI proxecta sete obras da cineasta francesa Claire Simon

A Coruña, 19 de maio de 2015.- A cineasta francesa Claire Simon será a protagonista nos vindeiros días da programación do CGAI (Centro Galego de Artes da Imaxe), que proxectará na súa sede da Coruña un total de sete obras representativas do estilo desta creadora, caracterizado por situarse a medio camiño entre o documental e a ficción.

O ciclo, que inclúe pases dobre de cada un dos títulos seleccionados (ás 18.00 e ás 20.30 horas), está programado en colaboración co Festival Play-Doc, encontro que desenvolveu a súa última edición en Tui do 22 ao 26 de abril con Claire Simon como artista internacional homenaxeada.

As primeiras proxeccións de Simon no CGAI serán hoxe 19 de maio, con ‘Les patients’, filme resultado do acompañamento durante un mes da cámara de Simon a un médico de familia a punto de xubilarse na súa consulta dunha pequena cidade de provincias; e ‘Récréations’, película filmada no patio de recreo dunha gardería, que constitúe un pequeno tratado filosófico sobre a vida en sociedade.

A estas dúas entregas seguiranlles o mércores 20 ‘Coûte que coûte’, a peripecia da apertura dunha pequena casa de comidas; o xoves 21 ‘Ça brûle’, sobre o namoramento que xorde entre Livia e o bombeiro que a socorre cando esta sofre unha violenta caída de cabalo; o martes 26 ‘Geographie humaine’ e o mércores día 27 ‘Gare du Nord’, estas dúas últimas ambientadas no cruce de camiños e de vidas que se produce día a día coa coñecida estación parisiense como escenario.

A realidade como punto de partida
As longametraxes, todas elas realizadas entre 1989 e 2013, reflicten a personalidade artística da autora, quen utiliza o campo do real (o patio de recreo, unha estación ou unha personaxe) como punto de partida ben para construír unha historia inventada ou ben para se desdobrar formalmente entre realidade e ficción.

Ademais, na extensión en Ourense que mantén o CGAI xunto coa Asociación Cultural Cineclube Padre Feijoo, a Biblioteca Pública Nodal acollerá tamén a obra de Claire Simon. En concreto, ‘Coûte que coûte’ poderá verse hoxe 19 de maio; ‘Mimi’ o día 25 e ‘Gare du Nord’ o 1 de xuño.

A vida dos Chévere
O CGAI fará unha parada na atención continuada que nos próximos días lle prestará a Claire Simon para ofrecer o sábado 23 de maio a proxección do documental ‘A viaxe dos Chévere’, do realizador galego Alfonso Zarauza, premio Mestre Mateo 2015 á mellor dirección polo filme ‘Os fenómenos’.

‘A viaxe dos Chévere’ é un achegamento filmado ao traballo e á vida dos compoñentes desta emblemática compañía escénica galega, galardoada polo Ministerio de Educación, Cultura e Deporte co Premio Nacional de Teatro 2014. A través dunha mirada moi persoal e poética que mestura teatro e cinema, Zarauza reflicte o material conseguido no seu acompañamento diario durante varios meses aos Chévere. A proxección será na sala do CGAI (Durán Loriga, 10) ás 18.00 horas, dentro do apartado Off Galicia, e con entrada gratuíta.

A programación completa pode consultarse na web www.cgai.org e na Axenda de www.cultura.gal