Nova: Firma e Filme conta coa participación de 43 produtoras e editoriais para a adaptación audiovisual de obras literarias galegas
22/06/2015
Firma e Filme conta coa participación de 43 produtoras e editoriais para a adaptación audiovisual de obras literarias galegas
A Agadic, que promove esta iniciativa en colaboración coa Agapi e a AGE, recibiu 52 propostas para levar ás pantallas outros tantos libros de diferentes xéneros e estilo
Ábrese agora o proceso de estudo e informe dos textos por parte de analistas de guión, previo á posta en común coas empresas audiovisuais daqueles títulos que encaixen cos seus intereses e proxectos
Santiago, 22 xuño de 2015.- O programa ‘Firma e Filme’ da Axencia Galega das Industrias Culturais (Agadic) espertou o interese de 43 empresas audiovisuais e editoriais galegas, que formalizaron xa a súa participación neste proxecto para promover a adaptación cinematográfica ou televisiva de obras literarias galegas. A Asociación Galega de Produtoras Independentes (Agapi) e a Asociación Galega de Editores (AGE) colaboran tamén na iniciativa, para a que se recibiron un total de 52 propostas para levar ás pantallas outros tantos libros de diferentes xéneros e estilos.
Tras a boa acollida desta convocatoria, á que responderon un total de 25 produtoras audiovisuais e 18 editoriais, a Axencia da Consellería de Cultura, Educación e Ordenación Universitaria iniciará agora un proceso de análise de guión e informe de todos os textos recibidos cara a avaliar as súas posibilidades de adaptación audiovisual.
Reunións executivas en Culturgal
Unha vez concluída esta fase, poranse en común coas diferentes empresas audiovisuais inscritas aqueles títulos que mellor encaixen cos seus intereses e proxectos actuais. O obxectivo é organizar unha axenda final de reunións bilaterais executivas entre as empresas de ambos os sectores no marco de Culturgal, a Feira das Industrias Culturais, que terá lugar do 4 ao 6 de decembro no Pazo da Cultura de Pontevedra.
‘Firma e filme’ nace co fin de poñer en valor dous importantes ámbitos creativos da cultura galega, o das imaxes e o das letras, a través dun proxecto conxunto que busca impulsar unha maior presenza da literatura galega tanto na pequena como na gran pantalla. Para confirmar a súa participación no programa, as editoriais tiveron que cumprimentar unha solicitude por cada obra achegada na que indicaron o seu xénero, o grupo de público potencial e o formato proposto para a súa versión audiovisual. Pola súa banda, as produtoras rexistradas sinalaron o formato no que teñen interese, os seus xéneros preferentes e máis o grupo preferente de espectadores ao que buscan dirixirse.