Nova: Cultura e Educación segue a incrementar o seu apoio ás industrias culturais con novas subvencións ás asociacións profesionais, á distribución e ás salas de exhibición

Santiago, 22 de xuño de 2014.- A Consellería de Cultura, Educación e Ordenación Universitaria continúa a incrementar o seu apoio ás industrias culturais galegas durante 2014 coa próxima publicación esta semana no Diario Oficial de Galicia (DOG) dunha liña de subvención dotada con 460.000 euros e dirixida a impulsar distintos aspectos clave do sector. A nova convocatoria destínase especificamente ao financiamento de accións concretas de distribución interior e exterior, ao fomento da actividade das asociacións profesionais e á axuda para o funcionamento de salas de exhibición de espectáculos de titularidade privada.

Segundo a resolución aprobada hoxe polo Consello Reitor da Agadic (Axencia Galega das Industrias Culturais) presidido polo conselleiro Xesús Vázquez Abad, a iniciativa centraliza os programas de apoio aplicados a reforzar o papel dos creadores individuais e das empresas culturais co obxectivo de consolidar un tecido capitalizado, competitivo e innovador e, ao mesmo tempo, a potenciar a comercialización de bens e servizos culturais de calidade, favorecendo a difusión da lingua e da cultura galegas como elementos diferenciais.

Un 9,15 por cento máis
A nova convocatoria incorpórase ao plan integrado de impulso ao sector das industrias culturais que se executará ao longo de 2014. A este programa, do que forman parte xa anteriores bases dedicadas á celebración de festivais audiovisuais, de escena e de música (tanto profesionais como afeccionados) e ao fomento da actividade escénica, sumaranse proximamente as lixas dirixidas especificamente ao ámbito da produción e desenvolvemento de proxectos audiovisuais.

Coa súa publicación, a Consellería de Cultura e Educación segue a aumentar as contías económicas globais dedicadas ao sector que se adxudicarán en réxime de concorrencia competitiva e seguindo criterios de obxectividade e transparencia, cifradas ata este punto do ano nun total de 1.550.000 euros (490.000 para festivais, 600.000 para actividade escénica e 460.000 para distribución, salas e asociacionismo). Isto representa un incremento do 9,15 por cento respecto ás cantidades para os mesmos contidos de 2013 (1.420.000 euros) e supón, ademais, a recuperación da atención especial ás asociacións e demais colectivos profesionais como novidade.

Distribución interior e exterior
O apartado de distribución para 2014 está dotado con 350.000 euros e céntrase no fomento da circulación dentro e fóra de España de bens e servizos culturais producidos por empresas e/ou compañías ou grupos profesionais con sede na nosa Comunidade Autónoma.

A distribución exterior, que deberá levarse a cabo entre o 1 de xaneiro e o 31 de outubro deste ano, poderá referirse á realización dunha serie de funcións (mínimo de tres e non máis de oito no mesmo espazo), á representación de espectáculos de artes escénicas ou concertos en feiras e festivais fóra de Galicia ou para a asistencia a feiras e mercados culturais tamén fóra de Galicia. Da distribución de espectáculos dentro do territorio galego poderán beneficiarse as empresas que presenten proxectos consistentes na realización dun mínimo de cinco representacións e nunca máis de catro nun mesmo espazo.

Asociacións e salas de ata 250 localidades
Resérvanse 50.000 euros a categoría relativa ao asociacionismo, á que poderán optar as entidades e asociacións profesionais representativas das empresas e profesionais no sector da produción e distribución de produtos ou servizos de consumo cultural.

Os requisitos que se lles esixen a estes colectivos son a ausencia de ánimo de lucro, ter social ou estatutariamente como obxecto social a promoción de calquera clase de produto cultural para a defensa dos seus intereses propios, e que o seu ámbito de actuación se limite ao autonómico.

As subvencións ás salas, ás que se dedican 60.000 euros, diríxense a persoas físicas ou xurídicas xestoras de espazos de artes escénicas de titularidade privada con capacidade igual ou inferior a 250 localidades. Para obter este tipo de subvencións, da que se exclúen os recintos pertencentes a asociacións ou outras entidades sen ánimo de lucro, deberase presentar un proxecto de programación artística para o presente ano 2014.