Nova: Yolanda Castaño e Patricia Lorenzo animan a aprender dos reveses na primeira sesión dos Xoves emprendedores do Gaiás
14/04/2016
Yolanda Castaño e Patricia Lorenzo animan a aprender dos reveses na primeira sesión dos Xoves emprendedores do Gaiás
A Cidade da Cultura anima á cultura emprendedora con este ciclo que busca demostrar que as malas experiencias á hora de levar a cabo un proxecto son necesarias para os éxitos futuros
Dinamizadas por Manolo Boquete, as vindeiras charlas terán lugar os días 19 de maio e 9 de xuño con entrada de balde
Santiago, 14 de abril de 2016.- A Consellería de Cultura, Educación e Ordenación Universitaria anima aos emprendedores a aprender do fracaso, comprobando que dunha mala experiencia é posible chegar a un proxecto de éxito. Será a través das testemuñas da poeta Yolanda Castaño e a actriz de Chévere, Patricia de Lorenzo, protagonistas da primeira xornada do ciclo ‘Xoves Emprendedores’, que ten lugar hoxe ás 19:30 horas no Gaiás.
Con ‘Xoves Emprendedores’, a Cidade da Cultura busca contribuír á cultura emprendendora, demostrando que non só dos éxitos se aprende. Así, ademais de Yolanda Castaño e Patricia de Lorenzo, o ciclo estará protagonizado por recoñecidas figuras da cultura galega como Antón Reixa, o xornalista Xosé Manuel Pereiro, o arqueólogo José Manuel Costa García ou a poeta Antía Otero; que a través do humor, a sorna e a ironía, contarán as súas historias de aprendizaxe, de como asumiron o fracaso como un proceso e como non se apoucaron ante as dificultades e buscaron un camiño para seguir adiante.
Manolo Boquete será o encargado de conducir as tres sesións dun ciclo que arranca hoxe na Sala Eisenman coa charla ‘Emprender é moverse: se non paras, non hai metas. A actriz Patricia de Lorenzo, coñecida polo seu traballo na compañía de teatro Chévere; e a poeta e dinamizadora cultural Yolanda Castaño contarán os seus proxectos de longo percorrido no ámbito da cultura e darán conta de como estes evolucionaron ao longo do tempo.
Programa
A seguinte cita terá lugar o 19 de maio e nesta ocasión o lema será ‘Emprender é equivocarse: é necesario caer para saber andar’. A veteranía no emprendemento cultural está personalizado nas figuras de Antón Reixa, filólogo, poeta, músico, guionista, director e presidente da produtora audiovisual Filmanova; e o veterano xornalista Xosé Manuel Pereiro, actual decano do Colexio Profesional de Xornalistas de Galicia e director xunto con Manuel Rivas da revista mensual Luzes.
Entre os dous contarán os múltiples proxectos que puxeron en marcha ao longo da súa dilatada carreira, con sortes distintas, ao tempo que evidenciarán como, a pesar dalgúns fracasos, seguen no centro da creación coas súas iniciativas.
A última sesión será o 9 de xuño baixo o título ‘Emprender é aprender: aprender é errar o tiro e avanzar’, para que contaremos con arqueólogo José Manuel Costa García e a poeta e responsable do selo editorial independente Apiario, Antía Otero. Eles serán os encargados de transmitir que entusiasmo e perseveranza son as claves comúns coas que levan a cabo os seus proxectos e coas que traballan para asentalos.
Cada sesión contará cun formato colaborativo, no que o público é parte implicada, participando en todo o momento da charla. Tras ela, o Instituto Galego do Viño, presente no Centro de Emprendemento da Cidade da Cultura, ofrecerá aos asistentes unha degustación, creando un ambiente distendido no que poder reflexionar sobre o escoitado e intercambiar experiencias.
Todas as sesións teñen lugar na Sala Eisenman da Cidade da Cultura a partir das 19:30 horas. A participación nestas xornadas é totalmente gratuíta, mais é preciso reservar praza a través do correo cem@cidadedacultura.gal ou a través do teléfono 881 99 98 99.