Nova: O Centro Coreográfico Galego estrea esta fin de semana As catro estacións

A Coruña, 6 de setembro de 2016.- O Teatro Colón da Coruña acolle esta fin de semana a estrea de ‘As catro estacións’ a cargo do Centro Coreográfico Galego (CCG), un espectáculo contemporáneo sobre a música de Antonio Vivaldi con coreografías de Iker Gómez e Kenneth Tindall. O escenario coruñés ofrecerá as dúas primeiras funcións da montaxe este venres e o sábado ás 20:30 horas, para emprender despois unha serie de representacións que levarán á compañía a Vigo, Rianxo, Vilagarcía, Ourense, O Barco, Pontevedra e Santiago de Compostela.

A responsable do Centro Coreográfico, Mercedes Suárez, asume a dirección desta nova produción co obxectivo de continuar a difundir a danza entre o gran público. Para isto, propón desta volta unha recreación da popular obra de Vivaldi, coa que se establece un paralelismo coa paisaxe galega a través das coreografías deseñadas e das imaxes que se proxectan no escenario.

As bailarinas Ailén Ramos, Inés Vieites, Elena Roses e Raquel Santacruz, e mais os bailaríns Juan Miguel Hernández, Víctor Molina, Pastor R. Feal e Pablo Aradillas conforman o elenco seleccionado a través dunha convocatoria pública de audicións para interpretar esta última creación da unidade de danza dependente da Consellería de Cultura, Educación e Ordenación Universitaria.

Música universal e creadores actuais

A estrea foi presentada hoxe na Coruña polo director da Axencia Galega das Industrias Culturais (Agadic), Jacobo Sutil, quen expresou a montaxe supón unha nova oportunidade para difusión e a defensa da danza en Galicia, así como o avance nas liñas emprendidas polo CCG con producións anteriores como ‘Quebranoces’ ou ‘A bela adormecida’, “xuntando –dixo– a mellor música universal cos mellores coreógrafos, bailaríns e bailarinas actuais”.

“Así nace este novo proxecto artístico, que se enfoca desde a perspectiva dunha compañía pública e coa dobre finalidade de acadar a exhibición artística de maior calidade, ao tempo que se procuran novos espectadores para a danza”, declarou.

Tamén destacou que despois do éxito da que foi a última produción realizada, ‘Full House’, a cargo do director sueco Johan Inger, chega ‘As catro estacións’ como un proxecto de rexistro moi diferente co que se dá testemuña, ademais, da versatilidade e as posibilidades creativas do Centro Coreográfico Galego.

Traballo compartido

No acto participaron tamén Mercedes Suárez e os coreógrafos convidados: o director e videocreador vasco Iker Gómez, colaborador habitual no programa formativo do CCG e titular da súa propia compañía de danza; e mais o británico Kenneth Tindall, un dos valores emerxentes na creación coreográfica internacional, como demostra a súa recente designación nos Dance Awards Critics Circle. Os tres explicaron o proceso de traballo realizado durante os dous meses anteriores na sede do Centro Coreográfico e nos últimos días como residencia artística no Teatro Colón.

Gómez asina as variacións correspondentes a Primavera e Inverno, en tanto que Tindall asumiu as de Verán e Outono. Outros membros do equipo artístico son Christelle Horna como repetidora, Alberto Casas no deseño de luces, Antonio Cid no vídeo e Manuel Lemos no deseño e fotografía. Tanto o son do espectáculo como a produción e a realización do vestiario foron levadas a cabo por persoal propio do CCG.

Xira por oito escenarios

Despois da súa estrea no Teatro Colón da Coruña, ‘As catro estacións’ visitará outros escenarios galegos, como o Teatro Afundación de Vigo (24 de setembro), o Auditorio Municipal de Rianxo (28 de outubro), o Auditorio Municipal de Vilagarcía (12 de novembro), o Auditorio Municipal de Ourense (19 de novembro), o Auditorio Municipal do Barco de Valdeorras (25 de novembro), o Pazo da Cultura de Pontevedra (26 de novembro) e o Salón Teatro de Santiago (1, 2 e 3 de decembro).

As entradas para asistir ás funcións da Coruña están á venda na billeteira electrónica de Ataquilla, no despacho do Teatro Colón os días do espectáculo de 12.00 a 14 e a partir das 17:00 horas, na sede Afundación A Coruña ata o sábado de 9.00 a 21.00 horas e na billeteira central da praza de Ourense ata o venres de 9.30 a 13.00 e de 16.30 a 19.30 horas.