Nova: Nova edición do Premio de Relato Breve Nélida Piñón
13/09/2016
Nova edición do Premio de Relato Breve Nélida Piñón
Cultura, o Concello de Cotobade e a Deputación de Pontevedra presentarán as bases do certame o próximo día 30 de setembro, nun acto que contará coa participación da escritora brasileira de raíces galegas
-
-
Anxo Lorenzo no Concello de Cotobade -
Anxo Lorenzo no Concello de Cotobade -
Anxo Lorenzo no Concello de Cotobade
Santiago de Compostela, 12 de setembro.- O Premio de Relato Breve Nélida Piñón, impulsado pola Xunta de Galicia, polo Concello de Cotobade e pola Deputación de Pontevedra, celebrará este ano a súa segunda edición, que será presentada o próximo 30 de setembro en Cotobade nun acto que contará coa presenza da escritora brasileira de orixe galega que lle dá nome ao certame literario.
Así o acordaron as tres institucións promotoras na reunión mantida o pasado día 9 de setembro en Cotobade, na que participaron o secretario xeral de Cultura, Anxo Lorenzo; o alcalde e mais a concelleira de Promoción Económica e Turismo de Cotobade, Jorge Cubela e María Pichel, respectivamente, e o deputado provincial de Cultura e Normalización Lingüística de Pontevedra, Xosé Leal.
O Premio de Relato Breve Nélida Piñón naceu o pasado ano 2015 cos obxectivos de fomentar a creación literaria en lingua galega, particularmente no ámbito da narrativa breve, e de honrar a escritora brasileira de raíces galegas Nélida Piñón, referencia imprescindible da literatura universal.