Nova: A cultura galega reforza a súa difusión exterior a través do Cervantes

Santiago, 18 de xaneiro de 2017.- O conselleiro de Cultura, Educación e Ordenación Universitaria, Román Rodríguez, reuniuse co secretario xeral do Instituto Cervantes, Rafael Rodríguez-Ponga un encontro no que lle propuxo a celebración dun acto de homenaxe en Madrid á figura de Carlos Casares, coincidindo co ano no que se lle dedica o Día das Letras Galegas. O obxectivo do departamento de Cultura da Xunta de Galicia é implicar neste acto, ademais de ao IC, á Real Academia Española, dada a importante relación que o autor tivo co actividade literaria nacional. A fundación que leva o nome do escritor, como non podería ser doutro xeito, sería tamén convidada a ser partícipe deste evento.

Durante o encontro, celebrado na sede madrileña do Instituto, o conselleiro e o secretario xeral afondaron tamén no desenvolvemento das liñas de actuación comprendidas no convenio asinado o pasado 7 de setembro entre ambas as partes, segundo o cal o Instituto Cervantes programará e realizará, en función da demanda existente, cursos de lingua e/ou cultura galega nos centros dependentes del, así como nas cidades nas que se radiquen lectorados de lingua, cultura e literatura galega dependentes da Rede de Centros de Estudos da Xunta de Galicia. A idea é consolidar os cursos en Pequín, Toquio e Berlín.

José Suárez no IC

No encontro, no que tamén participou o secretario xeral de Cultura, Anxo Lorenzo, abordouse tamén a posibilidade de levar a exposición ‘José Suárez. Uns ollos vivos que pensan’, da Cidade da Cultura de Galicia, a distintos centros do IC en Europa e Asia. Neste momento xa está pechada a exhibición da mostra nos centros do IC en París (Francia) e Toquio (Xapón), e estase plantexando tamén a posibilidade de que se amose en Nova Delhi (A India).

Equipamentos e eventos culturais

No caso da reunión co secretario de Estado de Cultura, Fernando Benzo, tivo por obxecto abordar a posibilidade de que o Ministerio participase en diferentes investimentos en equipamentos culturais na nosa Comunidade, que se irán concretando nos próximos meses.

Ademais, o conselleiro solicitoulle ao secretario de Estado a participación do seu departamento no ‘Conecta fiction’, mercado internacional de televisión que se celebrará en Santiago de Compostela do 21 ao 23 de xuño deste ano. Cofinanciado pola Xunta, o ICEX e a SGAE, Román Rodríguez transmitiulle a importancia da participación económica e organizativa da Secretaría de Estado neste evento.

Así mesmo, abordouse a posibilidade de que o Ministerio colabore na organización do Festival ‘Escenas de Cambio’, liderado pola Cidade da Cultura de Galicia, e que constitúe un ambicioso proxecto de danza, artes escénicas e creación contemporánea.