Nova: Os cidadáns consultaron máis de 17.600 caixas de documentos do Arquivo Histórico de Lugo durante 2016

Lugo, 22 de abril de 2017.- O Arquivo Histórico Provincial de Lugo, que depende da Consellería de Cultura, Educación e Ordenación Universitaria, atendeu o pasado ano a 1.962 usuarios externos á administración, que consultaron un total de 17.684 caixas de documentos. Ademais, o centro atende consultas das administracións e, en concreto, presta servizo ás unidades administrativas da Xunta na provincia.

O delegado territorial, José Manuel Balseiro, visitou o Arquivo e mantivo un encontro de traballo coa directora, Dolores Pereira, que explicou o importante servizo que este centro presta a investigadores e estudosos, pero tamén á cidadanía en xeral, que en numerosas ocasións acode aos fondos en busca dunha base documental sobre a que exercer os seus dereitos.

Non é por tanto estraño que entre os documentos mais consultados se atopen os catastros, tanto o Catastro do Marqués da Ensenada, do S.XVIII -sobre todo para determinar os lindes entre parroquias, e con eles os dereitos de uso dos montes comunais- como o Catastro dos anos 50, no que se poden localizar as fincas de propiedade privada.

Os cidadáns realizaron o ano pasado en total 2.320 consultas no propio Arquivo e 242 a distancia. O centro facilitoulles 17.224 copias (11.389 en papel e 5.835 dixitais), e entregou 40 certificados e 643 compulsas.

Polo que respecta á actividade administrativa, o Arquivo prestou ás unidades produtoras das administracións, tanto central como autonómica, 642 caixas de documentos.

O delegado territorial destacou o importante papel que desenvolve o centro “como custodio do noso patrimonio documental, que conserva, restaura e difunde para que, tanto nós como as xeracións vindeiras, coñezamos mellor a nosa historia”.

Neste sentido, subliñou que “é fundamental o labor de restauración dos documentos deteriorados para evitar que se perdan”. Actualmente, o Arquivo está a restaurar varios libros do Catastro do Marqués da Ensenada.

Cabe subliñar que xa finalizou a restauración do Códice da Montaría do Rei Joäo I de Portugal, do século XV, tratado sobre a caza do xabarín que se cría desaparecido e cuxas páxinas -en pergameo- foron utilizadas no século XVII para encadernar algúns protocolos do distrito notarial de Monforte de Lemos. Foron achados dez pregos enteiros, dez medios pregos e catro fragmentos, maioritariamente dos libros primeiro e terceiro e, en menor cantidade, do libro segundo.