Nova: O Centro Ramón Piñeiro presenta a versión definitiva do sintetizador de voz CoToVía

Santiago de Compostela, 14 de xullo de 2017.- O secretario xeral de Política Lingüística, Valentín García, presentou, a canda o director científico do Centro Ramón Piñeiro para a Investigación en Humanidades (CRPIH) e director do proxecto de investigación CoToVía, Manuel González, a versión definitiva do sintetizador de voz homónimo, unha ferramenta informática que permite a conversión dun texto escrito en galego nunha cadea oral.

Valentín García explicou que o CRPIH, dependente da Secretaría Xeral de Política Lingüística, foi pioneiro en desenvolver proxectos de tecnoloxía lingüística en galego coma o CoToVía que, “ademais do seu valor intrínseco para asegurar o funcionamento e utilidade da nosa lingua na actual sociedade da información e no futuro que nos agarda, abriron camiños seguidos posteriormente por outros equipos de investigadores e mesmo por empresas”. O secretario xeral referiuse ao estudo “O idioma galego na era dixital”, que forma parte do libro branco da rede de excelencia da Comisión Europea META-NET, e coincidiu coas súas conclusións, segundo as que “podemos ser moderadamente optimistas e afirmar que neste tipo de tecnoloxías o galego está ao nivel da maioría das linguas europeas de igual número de falantes, mesmo de idiomas que son oficiais de estados da Unión”.

Ao dispor de toda a comunidade

CoToVía é un proxecto interdisciplinar do CRPIH no que traballou un equipo integrado por enxeñeiros superiores de Telecomunicacións da Universidade de Vigo (baixo dirección de Eduardo Rodríguez Banga) e de lingüistas da Universidade de Santiago de Compostela (baixo a dirección de Manuel González González). O seu obxectivo foi construír un sistema de conversión automática texto-voz para a lingua galega. Ao longo dos últimos anos foron presentándose distintas versións ata chegar a esta definitiva, construída con unidades pregravadas extraídas da lingua natural.

Os sintetizadores de voz serven para garantirlles a accesibilidade web a persoas con discapacidades visuais, pero son tamén fundamentais en todas as linguas no mundo da automatización das comunicacións, da información e das relacións sociais: en postos de información automatizados (servizos de banca, reservas de billetes, lectura de mensaxes por vía telefónica...), no ensino de idiomas, no ensino de lectura a nenos con dislexia, nas alarmas orais, na verificación de texto etc.

A versión definitiva de CoToVía púxose ao libre dispor de toda a comunidade como Creative Commons, cunha licenza GPL 3.0+, de maneira que pode ser utilizada libremente por calquera empresa ou usuario, coa única condición do recoñecemento de que os seus autores son o CRPIH e a Universidade de Vigo. O enderezo para a descarga é ftp.net-snmp.org.

Tecnoloxías da fala

Entre as liñas de traballo do CRPIH sempre figurou a das tecnoloxías lingüísticas ou da fala, que permiten facer do galego unha lingua moderna, útil e eficiente para responder ás necesidades da sociedade actual e asegurar a súa viabilidade futura. Aínda que o proxecto CoToVía se considera hoxe finalizado, o mesmo equipo multidisciplinar que o desenvolveu seguirá traballando nunha nova dirección máis flexible e diversificada de elaboración de recursos auxiliares para o desenvolvemento deste tipo de tecnoloxías.