Nova: A Xunta incrementa nun 40% as axudas para a promoción do uso do galego por parte dos concellos
09/04/2021
A Xunta incrementa nun 40% as axudas para a promoción do uso do galego por parte dos concellos
Destínanse 350.000 euros a apoiar a creación, o reforzamento dos servizos lingüísticos, así como ás programacións municipais de dinamización lingüística
Poden solicitalas desde mañá ata o vindeiro 10 de maio
A convocatoria deste ano marca como ámbitos estratéxicos de actuación o deporte, a mocidade, as TIC, os servizos sociais ou a igualdade
Santiago de Compostela, 9 de abril de 2021.- A Xunta de Galicia publica hoxe no Diario Oficial de Galicia (DOG) a nova convocatoria de axudas para a promoción do uso do galego desde o ámbito local que supón un incremento do 40% no seu orzamento. Así, o Goberno autonómico destinará este ano 350.000 euros nunha convocatoria para que concellos e agrupamentos de concellos de máis de 3000 habitantes poden solicitar desde mañá ata o vindeiro 10 de maio a través da sede electrónica da Administración autonómica.
As axudas están destinadas a sufragar os gastos derivados da creación, do reforzamento e do mantemento de unidades técnicas especializadas en lingua galega, así como da programación de actividades específicas coas que dinamizar a lingua galega desde o tecido municipal. A orde de convocatoria deste ano marca como ámbitos estratéxicos de actuación o deporte, a mocidade, as TIC, o tecido económico empresarial, os servizos sociais e a perspectiva de xénero e igualdade entre homes e mulleres.
A Consellería de Cultura, Educación e Universidade incrementa a partida en 100.000 euros e destina un total de 350.000 euros. Os gastos subvencionables deben estar comprendidos entre o 1 de xaneiro e o 15 de outubro de 2021.
Impulso á recuperación do tecido creativo
A convocatoria enmárcase nas accións de promoción do galego desde o ámbito local que desenvolve a Consellería de Cultura, Educación e Universidade, entre as que destacan a Rede de Dinamización Lingüística (RDL), que integra máis de 200 entidades, e os programas e as iniciativas asociados a ela.
Neles, ten especial incidencia desde o ano pasado o desenvolvemento da programación de actividades do Fondo de Proxectos Culturais Xacobeo 2021, baixo os obxectivos de apoiar o sector cultural e os seus axentes e profesionais no contexto da covid-19, promover iniciativas que sirvan para acelerar a recuperación do tecido económico cultural e creativo galego e poñer a disposición da cidadanía unha oferta cultural e lingüística de calidade.