Nova: Román Rodríguez destaca a Fuxan os Ventos como “gardiáns do patrimonio sonoro, literario e instrumental de Galicia”

Santiago de Compostela, 14 de marzo de 2023 O conselleiro de Cultura, Educación, FP e Universidades, Román Rodríguez, salienta os 50 anos de historia de Fuxan os Ventos como “gardiáns do patrimonio sonoro, literario e instrumental de Galicia”, e cuxa traxectoria musical pode verse na exposición impulsada por Afundación en Santiago.

O titular de Cultura do Goberno galego asegurou que Fuxan os Ventos é “moito máis que unha banda musical” xa que os seus temas e mensaxes “sempre foron un espello do estado do pobo galego” a través da “permanente reivindicación da liberdade, da xustiza, da igualdade e da idea de Galicia por riba de todo”. “Isto convérteos nunha icona cultural e musical de Galicia”, abondou.

A mítica agrupación folk iniciou a súa andaina no ano 1971 e desde aquela ata hoxe foron consolidándose como un grupo de referencia que empregaba o idioma galego como un vehículo de transmisión cultural e de expresión poética. De aí que esta mostra sexa unha cita ineludible para “que todos os galegos se cheguen ao que xa é un anaco da súa historia recente”, asegurou o conselleiro, quen aproveitou tamén para amosar as condolencias polo recen falecemento de Moncho Díaz, un dos seus músicos máis carismáticos.

A mostra, que estará aberta ata o 27 de maio na sede de Afundación da rúa do Vilar de Compostela, recorre a historia do grupo a través do seu arquivo persoal, con audios inéditos, arquivos sonoros, partituras, carteis, fotografías, recortes de prensa e documentación variada.