Nova: A Xunta e a RAGBA impulsan unha programación especial para redescubrir a figura de Martín Códax, o trobador máis icónico da literatura galega

No acto, o responsable autonómico de Cultura referiuse ao homenaxeado este ano como un “pioneiro e precursor da música galega popular, que sería inconcibible sen a contribución desta figura histórica pioneiro e precursor dunha corrente artística que chega ata os nosos días”, salientou Román Rodríguez antes de lembrar que o seu legado xa lle valeu ser homenaxeado co Día das Letras Galegas no ano 1998 xunto cos tamén trobadores Johan de Cangas e Mendinho.

“Confío en que este ano os ritmos das súas cantigas de amigo soen por toda a nosa xeografía e tamén máis aló para reivindicar a gran vixencia do seu legado”, destacou o conselleiro. Así, para contribuír a súa divulgación e a celebrar a figura de Martín Códax, a Xunta de Galicia colabora coa Real Academia Galega de Belas Artes na realización dunha programación específica vinculada ao homenaxeado e que inclúe ciclos de concertos de cámara, unha guía didáctica e a xestión do Programa do Día das Artes.

Actividade nas bibliotecas da Xunta

Ademais, as bibliotecas xestionadas pola Consellería de Cultura tamén se suman a celebración cun amplo abano de actividades composto por concertos, recitais, espectáculos teatrais, mostras bibliográficas e proxeccións que comezará esta mesma tarde, ás 20,00 horas, coa actuación de LaMontagne & PicoAmperio na Biblioteca de Galicia da Cidade da Cultura e continuará mañá, ás 12,00 horas, co recital do pianista Borja Mariño e a soprano Carolina Monaca no Edificio Fontán.

Ademais destas propostas, as bibliotecas Ánxel Casal de Santiago e Juan Compañel de Vigo tamén organizan mostras bibliográficas ao redor da figura do trobador durante todo o mes de abril, espectáculos teatrais e musiciais e proxeccións de documentais para afondar no legado artístico de Martin Códax.