Nova: El Corte Inglés súmase á promoción da exposición da Xunta sobre Picasso, que encara o seu último mes

A Coruña, 2 de xuño de 2023 El Corte Inglés súmase á promoción da exposición da Picasso branco no recordo azul nun xesto por animar aos galegos, turistas e potenciais visitantes a achegarse á mostra organizada pola Xunta no marco do 50 aniversario da morte do autor que entra hoxe no seu último mes aberta ao público no Museo de Belas Artes da Coruña.

O delegado territorial da Xunta na Coruña, Gonzalo Trenor, que achegouse ao establecemento da rúa Ramón y Cajal en A Coruña, foi recibido pola directora de Comunicación de El Corte Inglés en Galicia e Asturias, Fuencisla Cid e pola directora do Museo de Belas Artes, Ángeles Pena. Alí está instalada desde hoxe unha gran lona promocional coa imaxe dunha das pezas estelares da exposición: Maya à la poupée, do Musée Picasso de París, unha obra mestra que ten a súa orixe temática na Coruña.

Alí, o representante autonómico agradeceu á entidade o seu apoio a esta mostra, “o principal fito cultural do ano en Galicia que xa visitaron milleiros de persoas desde a súa apertura o pasado mes de marzo”. Animou, ademais, a aproveitar ata o día 25 de xuño para visitala no Museo de Belas Artes. O acceso é gratuíto e pódese visitar todos os días agás os luns, no seu horario habitual, que pode consultarse na súa web.

Pola súa parte a directora de Comunicación compartiu o compromiso da súa entidade coa cultura destacando os 25 anos que cumpriu Ámbito Cultural de El Corte Inglés, “dende este programa impulsamos e achegamos a cultura á sociedade. E a promoción do ano Picasso, que tamén contará con actividades na tenda en outono, é unha celebración única da cultura e da Coruña”.

Comisariada por Antón Castro, Malén Gual e Rubén Ventureira, coa coordinación da directora do Museo de Belas Artes da Coruña, Ángeles Penas, e o seu equipo técnico, Picasso branco no recordo azul é a única exposición da Comunidade galega integrada na programación oficial da Celebración Picasso 1973-2023. Trátase dunha iniciativa na que a Xunta de Galicia se suma as homenaxes ao artista impulsadas polo Musée National Picasso-París e a Comisión Nacional para a Conmemoración do 50º aniversario, que conta con Telefónica como empresa colaboradora do programa en España.

Conmemoracións oficiais

O 8 de abril de 2023 cumpriuse o 50 aniversario do pasamento do artista español Pablo Picasso, evento que marcou a celebración da súa obra e a súa herdanza artística en Francia, España e internacionalmente.

Os gobernos de Francia e España acordaron traballar conxuntamente nun programa internacional a través dunha comisión binacional que reúne ás administracións culturais e diplomáticas dos dous países.

A Celebración Picasso 1973-2023 xira en torno a unhas 50 exposicións e eventos que se celebrarán en institucións culturais de renome en Europa e América do Norte que, xuntas, abordan unha análise historiográfica da súa obra. A celebración, acompañada de celebracións oficiais en Francia e España, permitirá facer un balance das investigacións e interpretacións sobre a obra de Picasso, especialmente durante a importante simposio internacional en outono de 2023 que, ademais, coincide coa apertura do Centre d’Etudes Picasso de París.

O Musée National Picasso-París e a Comisión Nacional española para a conmemoración do 50 aniversario da morte de Pablo Picasso comprácense en apoiar este programa excepcional.