Nova: Román Rodríguez salienta a aposta do FIOT de Carballo pola innovación e o papel do teatro como factor de transformación social

Así, o fío condutor desta 32ª edición será a loita contra a intransixencia, plasmada no deseño do cartel do evento a modo de aperta colectiva, con personaxes que representan a empatía, o agarimo e o afecto, entre outras calidades.

O conselleiro subliñou, ademais, que o FIOT ofrécelle ao público galego unha oportunidade para descubrir “non só o mellor da nosa creación, senón tamén para se asomar ao talento de referencia que se espalla por toda España e fóra das nosas fronteiras”, apoiándose na innovación e na sorpresa como sinais distintivos.

Ao tempo, o festival carballés “reivindica a importancia das artes escénicas como un elemento de coñecemento e de crecemento colectivo, ademais de defender a importancia da profesionalización do sector e a dignificación do esforzo de quen traballa nel”, continuou. Neste sentido, volve concederlles un lugar destacado ás actividades de mediación cultural, como xornadas profesionais, entrevistas ou encontros, para propiciar o intercambio entre público, compañías e outros axentes culturais. 

En canto ao programa de exhibición, no que se combinan moi diferentes linguaxes escénicas, Román Rodríguez fixo referencia á presenza de coñecidos nomes da escena estatal, como o ferrolán Javier Gutiérrez, Ariadna Gil, Vicky Luengo, Luis Bermejo, Juan Cavestany, Andrés Lima, Pepón Nieto, Pepe Viyuela ou Kulunka Teatro, xunto a figuras clave das nosas artes escénicas como Diego Anido, Cándido Pazó e a súa compañía Contraproducións, Redrum Teatro, Quico Cadaval, Roi Borallas, Antón Coucheiro, Soledad Felloza ou Caxoto, entre outros. 

Esta 32ª edición, na que se lle entregará o premio Xograresa de Outono á xornalista Ana Romaní, inclúe tamén 10 estreas aboslutas: Apaga o candil, espectáculo coproducido por Contraproducións e o propio FIOT; O pequeno poni, de Redrum Teatro; Sonchistorias, de Xan Veiga; Tres vellas na romaría, de Quico Cadaval, Celso Sanmartín e Guti; É meu amigo!, de A Trastenda dos Contos, e as cinco pezas do certame Metro Cadrado, que se poderán ver en espazos no convencionais do municipio nos sábados de outubro. 

Primeira vez en Galicia

Así mesmo, o Festival Internacional Outono de Teatro trae por vez primeira a Galicia as montaxes Forever, de Kulunka Teatro; La maja y la mona (y viceversa), de Maribel Salas e Susana Sotelo; Ma solitud, de Guillem Albà; Prima Facie, de Suzie Miller, con Vicky Luengo; El testamento, de Zum-Zum Teatre; Duelo, de Jean Philippe Kikolas; Hay alguien en el bosque, con Ariadna Gil, e Piensa en Wilbur, de Wilbur. 

O conselleiro de Cultura, Educación, FP e Universidades, quen participou nesta presentación xunto ao director do FIOT, Alberto Sueiro, e aos representantes das entidades locais implicadas, rematou a súa intervención felicitando á Asociación Cultural Telón e Aparte pola organización e mantemento dun evento deste nivel “con moito teatro de calidade, comprometido coa inclusión e conectado coa xente”. 

De feito, o festival carballés sumou máis de 10.000 asistentes na súa edición anterior, pola que foi recoñecido como a iniciativa cultural máis destacada de Galicia en 2022 pola Fundación Contemporánea. Nesta mesma liña, este ano Camiño Escena Norte, programa de intercambio entre Galicia, Asturias, Cantabria, País Vasco e Navarra que conta tamén co apoio da Xunta, elixiu o FIOT como representante galego na súa nova iniciativa Vieiros para establecer vínculos e darlle proxección exterior a un proxecto cultural por comunidade. Da man deste circuíto, chegará a Carballo Sexpiertos, de Tanttaka Teatroa, peza gañadora do Premio Max 2023 á mellor labor de produción