Nova: Máis de 3000 persoas gozaron dos cinco espectáculos galegos que viaxaron a Colombia grazas ao acordo da Xunta cos festivais de Manizales e Medellín

As artes escénicas galegas veñen de ser protagonistas en Colombia coa exhibición de cinco espectáculos como parte das carteleiras do Festival Internacional de Teatro de Manizales e do Festival Teatro y Música Comfama San Ignacio de Medellín, que contaron coa colaboración da Xunta de Galicia na coordinación e apoio económico a esta delegación. Máis de 3000 espectadores asistiron ás representacións de Continente María de Ainé Producións, Alma de tigre de Elefante Elegante, DeMente de Fran Sieira Compañía de Danza, O mel non caduca de Ibuprofeno Teatro e Orquestra de malabares de Pistacatro en diferentes espazos de ambas as mostras, cifra á que se suma o público que seguiu a retransmisión en directo desta última montaxe ofrecida desde Medellín pola televisión rexional de Antioquia.

O director da Axencia Galega das Industrias Culturais, Jacobo Sutil, integrou tamén esta delegación institucional e artística galega en ambos os festivais, onde mantivo diferentes xuntanzas cara a novas colaboracións que incidan na proxección exterior das nosas artes escénicas.

Neste sentido reuniuse con programadores de Colombia, así como de Arxentina e Panamá, ademais de co director do festival de Manizales e recoñecido xestor cultural, Octavio Arbeláez; co director e coa responsable de Cultura de Comfama, David Escobar e Paola Andrea Mejía, e coa secretaria de Produtividade e Competitividade de Antioquia, Daniela Trejo Rojas.

Acto promocional en Medellín

Xunto a esta última interveu, ademais, no acto promocional das artes escénicas galegas organizado pola Xunta no claustro de San Ignacio, en Medellín, no transcurso do que se puxo en valor o protocolo de irmandamento entre Galicia e o departamento de Antioquia, asinado en marzo de 2022 co fin de estreitar vínculos económicos, culturais e e turísticos entre ambas comunidades. Nesta liña incide precisamente o feito de que Galicia fose a convidada especial no 55º Festival Internacional de Teatro de Manizales, considerado o máis antigo do seu ámbito en Iberoamérica, e na sexta edición do Festival Teatro y Música Comfama San Ignacio de Medellín.

A representación galega nestes eventos estendeuse, así mesmo, ao V Congreso Iberoamericano de Teatro, que se celebrou en Manizales de xeito simultáneo á mostra. Nel participou o director do Centro Dramático Galego, Fran Núñez, cun relatorio titulado Retos de futuro dos centros de produción teatral como servizo público para a creación artística, desenvolvemento do territorio e participación da cidadanía, no que se centrou no papel desempeñado neste sentido pola unidade teatral da Xunta de Galicia.

Ao tempo, a actividade das compañías incluíu outras accións paralelas, como o obradoiro impartido en Medellín por Gonçalo Guerreiro, de Elefante Elegante, baixo o título Corpo / Espazo / Música / Obxecto. Os participantes tiveron a oportunidade de explorar dun xeito libre, improvisado e experimental a relación plástica con diferentes obxectos expresivos e a organización do espazo teatral e de traballo corporal directamente vinculados ás dinámicas musicais.

Plan Xeración Cultura

A colaboración da Xunta con esta destacada representación galega en Colombia supón a acción central do programa de proxección exterior das nosas artes escénicas que a Consellería de Cultura, Educación, FP e Universidades está a desenvolver este ano e que se enmarca, así mesmo, nun dos eixos do Plan Xeración Cultura.

Nesta mesma liña de traballo, sitúanse a convocatoria anual de subvencións á distribución de espectáculos e a dinámica de internacionalización emprendida polo Centro Dramático Galego, que se estende a 13 países a través da implicación da compañía pública en dous proxectos europeos e noutros programas de intercambio, ademais da organización de xiras e a presenza en festivais con producións propias e coproducións.