Nova: O DOG publica a aprobación da declaración do Corpus Christi de Ponteareas como Ben de Interese Cultural

Santiago de Compostela, 20 de maio de 2024

O Diario Oficial de Galicia (DOG) publica hoxe a declaración de Ben de Interese Cultural (BIC), na categoría do patrimonio inmaterial, da festa do Corpus Christi de Ponteareas (Pontevedra). O recoñecemento chega tras cos informes favorables do Museo do Pobo Galego, a Universidade de Santiago de Compostela e o Consello da Cultura Galega, nun proceso no que non se rexistraron alegacións e que se culminou coa súa aprobación no Consello da Xunta de Galicia do pasado 22 de abril.

Esta declaración valora tanto a festividade como os rituais, cerimonias e técnicas artesanais tradicionais asociadas a ela. Deste xeito, recoñécese que o Corpus Christi constitúe un ritual festivo recoñecido polo seu uso social e cerimonial cunha alta pegada de coñecementos populares sobre a natureza, os elementos naturais e os ciclos do campo. Ademais, ponse en valor a confección dun conxunto artístico dotado de variadas representacións e símbolos, cunha significación cultural que vai máis alá do ámbito relixioso para vincularse coa cultura popular. 

A máxima protección desta festa débese, tamén, ao elevado coñecemento e desenvolvemento de técnicas artesanais tradicionais. Exactamente, tense en conta o proceso de creación do conxunto ornamental, alfombras florais, cruceiros vexetais ou altares que conforman todo un conxunto de arquitecturas efémeras.

A declaración BIC do patrimonio inmaterial susténtase, ademais, en todo o conxunto de actos que se desenvolven ao redor do Corpus Christi. Ten unhas funcións sociais moi destacables, como a de lograr a integración dos participantes e da veciñanza da vila. Precisamente, recolle o seu potencial como activo económico de base cultural e salienta o sistema de organización e de integración social en círculos de relacións persoais e grupais da veciñanza, así como a gran acollida aos visitantes. Neste sentido, nos últimos anos realizáronse varias actividades para integrar dun xeito máis activo aos turistas, como nas recollidas e colocación dos materiais florais e vexetais.

Festividade medieval

O Corpus Christi é unha festividade católica medieval baseada no culto á eucaristía, unha tradición que foi adoptando elementos populares folclóricos e do ciclo agrario, que ao chegar á vila de Ponteareas adquire elementos diferenciables do carácter popular galego.

As alfombras de flores son o seu punto máis representativo e recoñecible, e da que se mantivo a súa transmisión entre xeracións das comunidades locais, que manteñen as canles para a participación dos seus membros.