Nova: A Casa do Rock poralle o ramo ao festival Go! Go! Zo! cunha macroactuación apoiada pola Xunta
16/09/2024
A Casa do Rock poralle o ramo ao festival Go! Go! Zo! cunha macroactuación apoiada pola Xunta
Valentín García salienta na presentación desta cita “a relevancia deste evento na promoción da lingua galega desde o rock”
A cuarta edición do festival pecharase o domingo co encontro musical de máis de medio cento de amantes do rock galego no Monte do Gozo
Santiago de Compostela, 16 de setembro de 2024
A escola de música A Casa do Rock poralle o ramo ao Festival Go!Go!Zo! cunha macroactuación no Monte do Gozo apoiada pola Xunta de Galicia na que participarán máis de 500 amantes do rock de Galicia. O secretario xeral da Lingua, Valentín García, presentou a iniciativa hoxe á mañá acompañado por Julio Asorey, organizador do festival, e por Adrián Hernández, un dos fundadores da Casa do Rock.
No acto, o representante da Consellería de Cultura, Lingua e Xuventude salientou “a relevancia desta cita que acollerá o Monte do Gozo o domingo 22 para a promoción do uso da lingua galega desde o rock”, así como “o compromiso das escolas de música que teñen o galego nos piares da súa creatividade e que contribúen a crear canteira”. O responsable da Lingua agradeceu a colaboración de Go! Go! Zo! e da Casa do Rock por “amplificar as posibilidades das novas promesas da música de Galicia, non só por esta proposta, tamén con aqueles que achegaron aos peregrinos nos albergues de Melide, Arzúa e Sarria as bandas noveis do país”.
Inscrición aberta para participar
Este domingo 22 a partir das 16,00 horas, o Festival Go! Go! Zo! abre as súas portas no Monte do Gozo para ofrecer a macroactuación organizada pola Casa do Rock con versións en galego de temas míticos do rock de sempre como Born To Be Wild, de Steppenwolf; Holiday, de Green Day; Believer, de Imagine Dragons, e o himno da mesma escola.
Ao encontro, no que xa se prevén máis de medio milleiro de asistentes, pode participar calquera persoa, tanto cun instrumento como coa súa voz. O único requisito para facelo é inscribirse no web oficial da escola e descargar as partituras.
Ademais do macroconcerto, a programación ofrecerá tamén unha actuación de combos musicais, na que sete grupos noveis galegos lle amosarán ao público as súas creacións e o seu talento: Rocke Experience, The Ages, Hombres Hell, QDL, ParaZmol, Rexoufeiros e D-buxos.