Nova: López Campos gaba o enorme talento e creatividade a través do galego do alumnado da comunidade

Santiago de Compostela, 8 de novembro de 2024

O conselleiro de Cultura, Lingua e Xuventude, José López Campos, enxalzou hoxe o “enorme talento e creatividade en galego” dos escolares da Comunidade. Así o valorou na entrega dos Premios a curtametraxes de animación en galego Nós tamén creamos! 2023-2024, no Centro Galego de Arte Contemporánea.  

Acompañado polo secretario xeral da Lingua, Valentín García, e pola directora xeral de Ordenación e Innovación Educativa, Judith Fernández, o conselleiro gabou a “gran calidade” dos proxectos presentados na duodécima edición de Nós tamén creamos! na  que participaron 24 centros de educación Primaria de toda Galicia. O concurso volveu contar coa colaboración da Compañía de Radio-Televisión de Galicia e con OQO editora, xa que a rapazada de entre 3 e 11 anos realiza adaptacións audiovisuais coa técnica de stop-motion dos seus álbums ilustrados.

O máximo responsable de Lingua do Goberno galego salientou o papel deste certame entre os escolares ao permitirlles “crear e divertirse” a través do audiovisual e do galego, “demostrándolles a utilidade sen límites, nin de idade nin de creatividade, de ambas linguaxes”, valorou.

Precisamente, explicou que a Consellería de Cultura, Lingua e Xuventude poñerá en marcha de cara ao ano 2025 medidas de colaboración con creadores de contido audiovisual que axuden a favorecer a creación de vencellos entre a lingua e estas xeración máis novas, especialmente, entre os escolares. Por estes motivos, erixiu o audiovisual como unha “ferramenta imprescindible” da que a Xunta tirará proveito para “aumentar o prestixio e o emprego da nosa lingua entre o alumnado”.

Finalmente, López Campos felicitou os pequenos e pequenas participantes, aos que lles gabou a “calidade creativa, arriscada e valente” e que considerou o “exemplo do espírito do sector cultural galego”, do que salientou o “bo momento” que está atravesando, “tal e como reflicte que supoña o 3 % do Produto Interior Bruto galego”.

As curtametraxes gañadoras

En total, galardoáronse sete centros educativos de primaria xa que, en tres das catro categorías existentes para educación Primaria, a calidade dos traballos presentados propiciou que se lles concedesen accésits.

Deste xeito, o primeiro galardón da categoría de 2º ciclo de educación Infantil foi para o proxecto  Caracola, da EEI do Vao (Pontevedra) e déuselle un accésit a Quen levou o pemento de Padrón das EEI de Escravitude, de Pontecesures.

O premio para 1º e 2º de educación Primaria foi parar ao audiovisual Quen levou a Lúa?, do CEIP Carlos Casares, de Nigrán (Pontevedra), mentres que a distinción en 3º e 4º de educación Primaria recaeu en Quen levou a Lúa, do colexio CEIP  A Igrexa-Calo, de Teo (A Coruña). Nesta categoría, tamén se decidiu entregar un accésit ao audiovisual Chocolata, do CEIP Plurillingüe Condesa de Fenosa, do Barco de Valdeorras (Ourense).

Finalmente, na categoría de 5º e 6ª de Primaria, o primeiro galardón foi para O que ten que aprender un cempés, do CEIP Viñagrande-Deiro, de Vilanova de Arousa (Pontevedra). A maiores, distinguiuse cun accésit á curtametraxe A sopa queima, do CEIP Ramón Otero Pedrayo, da Laracha (A Coruña).

Todas as curtas premiadas e as do resto dos 24 centros escolares participantes poderanse visualizar no Portal da Lingua Galega, na súa canle de Youtube e, ademais, na sección infantil e na aplicación Xabarín da Compañía de Radio-Televisión de Galicia.