Nova: O director do Festival de Donosti reúnese con profesionais do audiovisual galego
06/05/2015
O director do Festival de Donosti reúnese con profesionais do audiovisual galego
José Luis Rebordinos, que foi presentado polo director da Agadic, ofreceu unha charla-coloquio sobre as claves e oportunidades que brinda o certame donostiarra e mantivo reunións individuais
O encontro desenvolveuse na sede do CGAI na Coruña como parte do programa formativo Galicia ProFilme
-
O director do Festival Internacional de Cine de Donosti, José Luis Rebordinos -
Jacobo Sutil e o director do Festival Internacional de Cine de Donosti, José Luis Rebordinos, na rolda de prensa
A Coruña, 6 de maio de 2015.- O director do Festival Internacional de Cine de Donosti, José Luis Rebordinos, reuniuse hoxe na Coruña con representantes das principais empresas e asociacións audiovisuais galegas, no marco do programa formativo Galicia ProFilme organizado no CGAI (Centro Galego de Artes da Imaxe) pola Agadic (Axencia Galega das Industrias Culturais).
O director da Agadic, Jacobo Sutil, acompañou o protagonista da xornada, que onte presentou tamén na filmoteca galega ‘Magical Girl’, a película de Carlos Vermut galardoada coa Cuncha de Ouro na última edición do certame donostiarra. Baixo o título ‘Festival de San Sebastián: claves e oportunidades’, Rebordinos explicoulles brevemente aos presentes as posibilidades de promoción e de encontro con promotores que lles pode ofrecer aos traballos galegos o festival que dirixe desde hai máis de catro anos.
Despois desta charla-coloquio, que contou cunha activa participación dos presentes, José Luis Rebordinos mantivo xuntanzas individuais co obxectivo de abordar as cuestións particulares de cada asistente dun xeito máis concreto.
O Festival Internacional de Cine de Donosti inclúe distintos eventos e sesións de ‘pitching’ dirixidas ao intercambio profesional para a posta en marcha de proxectos conxuntos e para favorecer o seu financiamento ou comercialización, tales como ‘The Industry Club’, o Foro de Coprodución Europa-América Latina ou a canle de cooperación aberta co festival de Cannes para a presenza europea no Ventana Sur de Bos Aires.
Licenciado en Pedagoxía Especial, José Luis Rebordinos leva sendo director da Unidade de Cine de Donostia Kultura durante os últimos 22 anos. Tamén foi director durante 21 anos da Semana de Cine Fantástico e de Terror e durante oito, do Festival de Cine e Dereitos Humanos de Donosti. Dirixe a colección de libros Nosferatu e é coautor de diferentes volumes sobre cineastas vascos, cine asiático e outros temas. Antes de pasar a ocupar o cargo de director do Festival de Cine de Donosti o 1 de xaneiro de 2011, formou parte do seu Comité de Dirección durante 15 anos.