Nova: O Festival Imaxinaria trae a Galicia co apoio da Xunta as máis destacadas curtas de animación europeas

A Coruña, 24 de febreiro de 2025

O festival internacional de animación Imaxinaria regresa por terceiro ano consecutivo á Coruña para amosarlle ao público galego unha selección das máis destacadas curtametraxes europeas neste ámbito. O certame, organizado por Afundación en colaboración coa Consellería de Cultura, Lingua e Xuventude, desenvolverase do 12 ao 16 de marzo arredor dunha sección competitiva e varias paralelas, como a que se lle dedica este ano á animadora británica Joanna Quinn.

O director da Axencia Galega das Industrias Culturais, Jacobo Sutil, interveu esta mañá na presentación do evento, durante a que incidiu na súa contribución á difusión do cinema de animación, un ámbito no que Galicia “é desde hai anos unha referencia, tal e como demostra o histórico recente dos premios Goya”, subliñou. O representante da Xunta de Galicia participou no anuncio desta programación xunto ao director xerente de Afundación, Pedro Otero; os responsables da dirección do certame, Alberto Vázquez e Matilde Domínguez, e o director do Banco de Alimentos Rías Altas, Manuel Mora, entidade benéfica á que se lle destina integramente a recadación das entradas.

Na sede coruñesa de Afundación poderán verse as 43 películas a concurso da Sección Oficial, das que 38 proceden de diferentes países europeos e, na súa meirande parte, terán aquí a súa estrea española ou galega. Entre as fitas seleccionadas, figura Sobre el rostro, da galega Uxía Larrosa Villanueva.

Foco Galicia

Galicia conta, así mesmo, co seu propio foco a través do concurso Talento Novo, destinado ás novas xeracións que se están a formar na nosa Comunidade.

En canto ao resto das seccións paralelas, este ano a madriña do festival será Joanna Quinn, recoñecida internacionalmente polo estilo persoal dos seus filmes, polos que ten recibido máis de 90 galardóns nos máis prestixiosos festivais do circuíto internacional. A realizadora británica ofrecerá unha clase maxistral de animación e será a protagonista do coloquio que acompañará unha retrospectiva da súa obra, ademais de recoller o galardón honorífico de Imaxinaria na sesión de clausura do festival.

O encontro recibirá tamén o músico, compositor e animador Coke Rioboó, quen formará parte do xurado da Sección Oficial, ao tempo que será obxecto doutra das retrospectivas do certame, ofrecerá unha charla sobre técnicas de animación e recibirá o premio Activismo en Acción.

O público de Imaxinaria terá igualmente a oportunidade de ver na Coruña o clásico europeo La Planéte Sauvage, cinta francesa de ciencia ficción que en 1973 se alzou co premio especial do xurado no Festival de Cannes, de coñecer os traballos que están a transformar o panorama da animación na sección Novos Horizontes, que este ano convida o artista francés Boris Labbé, e de gozar das proxeccións e obradoiros dos seus programas para escolares e para público familiar.