Nova: A Xunta reúne talento galego e internacional na danza, a música e as artes vivas para unha edición de Escenas do cambio con sete estreas en Galicia

Santiago de Compostela, 17 de marzo de 2025

O director xeral de Cultura, Anxo M. Lorenzo, presentou hoxe a programación de Escenas do cambio 2025, festival que aposta este ano máis ca nunca por transcender os límites físicos de territorios e escenarios para a creación escénica de vangarda. Do 8 ao 11 de maio, Escenas do cambio convoca na Cidade da Cultura e o Salón Teatro a artistas procedentes de oito países (España, Alemaña, Australia, Bélxica, Corea do Sur, Cuba, Portugal e Suíza) para dar forma a unha programación composta por 15 espectáculos que hibridan danza, teatro, música e artes vivas.

Acompañaron ao representante da Consellería de Cultura, Lingua e Xuventude no acto, que tivo lugar no Museo Centro Gaiás, a directora xerente da Fundación Cidade da Cultura de Galicia, Ana Isabel Vázquez, a directora artística de Escenas do cambio, Kirenia Martínez, así como Julia Laport e Mercedes Peón, dúas das artistas galegas que participarán no festival, representantes da combinación de talento novo e experiencia pola que vén apostando o evento.

Entre a nostalxia e a utopía

Kirenia Martínez debullou as propostas desta undécima edición, que agrupou conceptualmente baixo o título Lostopía, novidoso termo co que fai referencia á tensión na que habitan as sociedades contemporáneas actuais. Segundo explicou a bailarina e coreógrafa, sería este un punto entre a nostalxia polo perdido e a busca de novas identidades, entre a resistencia ao cambio e a vontade de transformación.

Neste sentido, atoparemos en Escenas do cambio obras con temáticas tan actuais como a subversión do amor romántico que propón a cantante suíza de orixe mexicana Raissa Avilés no seu atípico concerto La María, o la espeluznante seducción de una canción de amor. Tamén reflexionaremos sobre a representación das persoas racializadas nas artes e na historia a través das dúas partes do tríptico performativo Black Through Red que concibiu o artista canario Reinaldo Ribeiro.

A memoria, a identidade cultural e a utilidade da arte como experiencia compartida son a materia que leva ao escenario Amalia Fernández nos tres actos que compoñen a súa creación máis recente: Solala. Por outra banda, o grupo suízo Fluctus recorre ao humor e ao teatro físico en I’m not a hero para cuestionar directamente ao publico se merece a pena o esforzo de intentar ser heroe hoxe en día, ou é mellor deixar que outra persoa asuma o papel.

A saúde mental, os coidados e a revisión histórica con perspectiva de xénero están no centro da conferencia escénica debuxada Familia Nijinska, que propoñen as galegas VACAburra. A modo de contrapunto indómito, atopamos a reivindicación do baile e da cultura club como elementos de resistencia creativa e xeradores de comunidade que atravesan as pezas Velaiquich, Amoorch!, do novísimo Colectivo D’elas, e Exposure, colaboración internacional entre a veterana compañía Danza Contemporánea de Cuba e o Urban Arts Ensemble Rurh (Alemaña) co son en directo do prestixioso compositor e músico de cinema australiano Ben Frost.

De estrea en Escenas do cambio

Exposure é tamén unha das dúas pezas internacionais, xunto co poético solo de danza Worn Out, do grupo surcoreano Chumpan Yamoo, que terán en Escenas do cambio a súa estrea a nivel español. Por outro lado, Raissa Avilés desde Suíza e Nuisis Zobop desde Portugal escolleron Escenas do cambio 2025 para presentar ao mundo as súas últimas creacións: La María, o la espeluznante seducción de una canción de amor) e a mestura de danza e filosofía, Fuga para o tempo presente, respectivamente.

En liña co obxectivo da Xunta de Galicia por xerar espazos para o desenvolvemento da vangarda escénica, o festival contará, ademais, con tres estreas absolutas de creadoras do país: Velaiquich, Amoorch!, dirixida por Julia Laport; Baunsbak, de Elvi Balboa, e o proxecto musical O intanxible e o non mundo, de Mercedes Peón, pensado para ser retransmitido exclusivamente a través da Rede. Completa a representación galega en Escenas do cambio a performance musical Roland mon Amour, co-produción de Funboa Escénica e o Centro Dramático Nacional co apoio do Centro Dramático Galego, e o proxecto en residencia artística no Gaiás de Familia Nijinska.

Para todos os públicos

Escenas do cambio 2025 inclúe no seu programa tres actos pensados para todos os públicos: Velaiquich, Amoorch!, peza que abrirá o festival o xoves 8 de maio convocando ao público a unirse ao baile como motor creativo. Adultos e cativada poderán gozar tamén dos tres pases de So de Cop nos que Arnau Obiols recrea dentro da Cidade da Cultura o misterio e a sonoridade do bosque con pequenos enxeños mecánicos e visuais a partir pedras, madeiras, dentes, auga, caracois e outros elementos naturais. O terceiro acto será a instalación participativa Ruido, na que calquera persoa a partir dos 8 anos de idade poderá poñerse na pel do deseñador de son dun filme.

Comando dramatúrxico

Na súa segunda convocatoria, o Comando dramatúrxico configúrase como un laboratorio/escola que activará en Escenas do cambio unha serie de accións orientadas a tender pontes entre espectáculos e públicos, incluso con aquelas persoas que non poidan estar presentes e coas xeracións do futuro. Coordinado unha vez máis polo profesor, dramaturgo e escritor Afonso Becerra, o grupo organizará un encontro no domingo 11 de maio no que ofrecerá algunhas chaves da súa aventura dramatúrxica ao longo dos catro días de festival.

Toda a información da programación de Escenas do cambio está dispoñible na web da Cidade da Cultura e tamén na do festival. As entradas poden adquirirse xa no Museo Centro Gaiás e en Ataquilla.

O festival conta coa colaboración do Instituto Nacional de las Artes Escénicas y de la Música – INAEM, o Goethe Institute, a Axencia Galega das Industrias Culturais e o Centro Dramático Galego.