Nova: López Campos considera “clave” o papel da literatura en galego entre os máis novos para “facer medrar o número de lectores e de falantes na nosa lingua”

02/04/2025
López Campos considera “clave” o papel da literatura en galego entre os máis novos para “facer medrar o número de lectores e de falantes na nosa lingua”
O responsable de Cultura da Xunta destaca a “enorme calidade creativa” dos autores e autoras galegas “como demostran os numerosos premios que reciben”
Erixe a Galicia como “potencia e referente cultural” e atribúeo á fortaleza e profesionalidade do sector cun “inquebrantable” apoio da Administración galega
Pon en valor o plan de dinamización da lectura da Consellería que se vai pór en marcha para incrementar os hábitos lectores na Comunidade, “superiores xa á media nacional”
Vedra (A Coruña), 2 de abril de 2025
O conselleiro de Cultura, Lingua e Xuventude, José López Campos, considerou hoxe “clave” a creación literaria en galego dirixida aos máis novos para conseguir “incrementar e facer medrar o número de novos lectores e falantes na nosa lingua”. Fíxoo durante a súa visita ao colexio Ortigueira, no municipio coruñés de Vedra, co gallo da programación que desenvolveron no centro escolar para a celebración do Día do Libro Infantil e Xuvenil.
O responsable de Cultura da Xunta valorou a contribución deste xénero literario para atraer novos lectores e, consecuentemente, tamén novos falantes ao galego e que atribuíu á “enorme calidade” dos autores e autoras galegas, “como demostran os numerosos recoñecementos que reciben”.
Neste senso, referiuse, a modo de exemplo, ás creacións en literatura infantil e xuvenil de Rosalía Morlán, Eva Mejuto, Paula Carballeira, Xabier Queipo ou Ledicia Costas. Precisamente, lembrou que esta última foi homenaxeada polo Goberno galego no Día das Escritoras pola súa excelsa traxectoria, e salientou que hoxe, precisamente, se lle ten concedido o Premio El Barco de Vapor de literatura infantil, que se suma a un Premio Nacional de Literatura Infantil e Xuvenil, tres Premios Lazarillo e dous White Raben, “converténdose na única autora galega en conseguir esta distinción internacional en dúas ocasións”, valorou.
“A calidade das obras de todas estas autoras e autores fan país e fan que máis dos nosos se animen a ler máis e no noso idioma”, asegurou López Campos, ao tempo que se amosou convencido de que ter referentes como estes desde a infancia en galego, como neste caso na literatura, sempre anima os máis novos e novas “a sacar a lingua que levan dentro”.
Plan de dinamización da lectura
Nesta contribución á consecución de novos lectores e en galego, o titular de Cultura puxo en valor o Plan de dinamización da lectura que se vai pór en marcha. Nel recóllense os eixes e as liñas estratéxicas a seguir pola Xunta ata o 2029 co propósito de “continuar a incrementar os hábitos lectores na Comunidade, nun momento no que Galicia rexistra uns índices superiores á media nacional, situándose no seu mellor momento histórico”.
Ao respecto, lembrou que Galicia chegou no 2024 a un 66,2 % no número de lectores, o que supón 5,7 puntos máis que a porcentaxe rexistrada en 2023, segundo o Barómetro de hábitos de lectura e compra de libros de España en 2024, “acadando a mellor estatística da serie histórica”. Uns datos, apuntou, que “demostran a efectividade das políticas públicas da Xunta que reforzamos con este plan que se vai converter nunha importante e imprescindible folla de ruta”.
Galicia, referente e potencia cultural
Finalmente, o conselleiro celebrou o “momento espectacular” que está a vivir a cultura galega en todas os seus eidos e disciplinas artísticas “tal e como están a demostrar os recoñecementos dentro e fóra da nosa Comunidade”. Precisamente, referiuse aos premios de carácter nacional con “marca Galicia e en galego” outorgados recentemente á poeta Chus Pato, ao escritor Manuel Rivas, á ilustradora Bea Lema ou aos produtores Lorenas Ares e Carlos Fernández, cun Goya á mellor curtametraxe de animación.
Para López Campos, todos estes galardóns confirman que Galicia é “unha potencia e referente cultural” e atribuíno especialmente a que a Comunidade conta cun “forte tecido cultural composto por grandes profesionais de cada un dos ámbitos culturais, tanto literario e audiovisual, como escénico, artístico ou danza”. A todos eles garantiulles o compromiso do Goberno galego de manter o seu “constante e inquebrantable apoio” para que sigan desenvolvendo os seus proxectos.