Nova: O teatro e a música de Os Axóuxeres chegan a Boiro e Ourense

Santiago, 20 de setembro de 2015.- A nova edición do programa de dinamización lingüística ‘Os Axóuxeres’, que ten como obxectivo promover o uso do galego e a súa transmisión interxeracional nas familias novas con bebés e nenos/as de 0 a 6 anos, pechou onte a súa segunda fin de semana de xira con grande acollida de público en Ourense e en Boiro. Logo das primeiras funcións en Arteixo e na Coruña, na fin de semana da estrea, o venres déronse cita na Cidade das Burgas e onte na localidade barbanzá de Boiro.

As seguintes funcións acolleranas os concellos de Ames (venres 25, na Casa da Cultura do Milladoiro, ás 18:00 horas), Vedra e Santiago de Compostela (sábado 26, no Museo Modesto Paz Camps ás 18:00 horas e no Centro Sociocultural das Fontiñas ás 19:00 horas) e Teo (o domingo 27 no Auditorio da Ramallosa ás 12:00 horas). Para as catro elas abrirase en exclusiva mañá, luns, a inscrición previa telefónica no número 697 363 089, na que as familias poden anotar os seus bebés e nenos/as de 0 a 6 anos cun acompañante adulto. Coma sempre, a entrada é de balde ata completar a capacidade das salas.

'Os Axóuxeres’ é unha proposta da Consellería de Cultura, Educación e Ordenación Universitaria da Xunta de Galicia a través da Secretaría Xeral de Política Lingüística que chega á súa sétima edición ofrecéndolles ás familias con cativos de 0 a 6 anos espazos de lecer en galego e tamén materiais para continuar xogando e cantando ao remate do espectáculo. O disco ‘Os Axóuxeres’, co que se agasallará a todas as familias participantes, e tamén os materiais das edicións anteriores pódense descargar de balde en http://ir.gl/1febfb.

O peixiño de Mariña
Mariña. Rapaza con nome de auga, de vida cara ao mar, é a protagonista desta historia e quen un día de praia decide que ese peixiño que apañou vai ser o seu mellor compañeiro de cuarto do mundo: "sempre quixen ter un peixiño e por fin o conseguín!". Xa na casa, o animaliño cada vez está máis triste... Será o seu amigo Muriel quen tente convencer a rapaza para que o ceibe: "os peixes do mar teñen que ficar no mar".

Mariña, rapaza lista e espelida, comprende que o seu fiel amigo leva razón: o mar ofrécelle ao peixe todo o que precisa para vivir e ser feliz, aínda que tamén agocha dificultades que os seres que o habitan atopan día tras día... e para o peixiño de Mariña non vai haber excepción. Unha aventura teatral, musical e lúdica na que a xente miúda se mergullará na profundidade do mar para sentir de preto valores como a ecoloxía ou a amizade. Unha experiencia sensorial e lingüística coa que aprender e levar para a casa divertidas cancións, adiviñas e xogos.

A festa da música, dos xogos e das palabras
‘Os Axóuxeres’ é a festa da música, dos xogos e das palabras. Un espectáculo de dinamización lingüística baseado en historias adaptadas á xente miúda da casa e mesturadas con cancións e xogos especificamente creados para a montaxe. ‘Os Axóuxeres’ coida dun xeito especial a calidade da montaxe cunha estética dinámica e actual, e maila acollida ás familias para asegurar que os nenos e nenas asocien o galego con experiencias cheas de tenrura e diversión.

Estrelas dormen, Voga valente, Vou navegar, Entre o mar e esta bañeira e Mergullo son as cancións orixinais dos novos Axóuxeres, que María Torres e Gonçalo Guerreiro (directores da compañía Elefante Elegante) interpretan en directo acompañados polos músicos Mano Panforreteiro e Dani Pais, e que recolle o cedé homónimo, no que tamén se poden escoitar brinquedos e adiviñas infantís.

Unha xira por 26 puntos de Galicia
Esta nova edición de 'Os Axóuxeres' está a chega, desde a pasada fin de semana, a 26 concellos pertencentes á Rede de Dinamización Lingüística (RDL) da Xunta de Galicia: A Estrada, A Laracha, Ames, Cangas, Fene, Ferrol, Foz, Lalín, Moaña, Mondoñedo, Noia, O Carballiño, Oleiros, O Porriño, Redondela, Ribeira, Santiago de Compostela, Teo, Vedra, Vilagarcía de Arousa, Viveiro e Xinzo de Limia.

Listaxe á que hai que engadir A Coruña, Boiro, Ourense e Arteixo. Foi, precisamente, esta localidade da área metropolitana da Coruña a que acolleu a estrea desta edición do espectáculo o pasado sábado 12 cun grande éxito de acollida. O calendario completo da actividade pódese consultar no web institucional http://ir.gl/1febfb e tamén na Axenda de Cultura de Galicia.