Nova: Fina Casalderrey, Domingo Villar e Ledicia Costas levan a literatura galega ás bibliotecas municipais arxentinas
25/04/2016
Fina Casalderrey, Domingo Villar e Ledicia Costas levan a literatura galega ás bibliotecas municipais arxentinas
Os tres escritores manterán hoxe encontros cos lectores e lectoras no marco da programación galega na Feira Internacional do Libro de Bos Aires
O secretario xeral de Cultura e o director xeral do Libro da Cidade de Buenos Aires abordaron esta mañá as liñas estratéxicas dos dous gobernos a prol da mellora dos servizos bibliotecarios, da promoción da lectura e do impulso do sector editorial
A Xunta de Galicia e o Goberno da Cidade tamén colaboran na difusión dos itinerarios culturais polos murais de Luis Seoane na capital porteña
-
Fina Casalderrey -
Domingo Villar -
Ledicia Costas -
O secretario xeral de Cultura e o director xeral do Libro da Cidade de Buenos Aires mantiveron unha reunión esta mañá -
O secretario xeral de Cultura e o director xeral do Libro da Cidade de Buenos Aires
Bos Aires (Arxentina), 25 de abril de 2016.- A literatura galega chega ás bibliotecas municipais da capital Arxentina a través dos encontros cos lectores e lectoras que manterán hoxe os escritores Domingo Villar, Fina Casalderrey e Ledicia Costas, que participan estes días na programación de Galicia na Feira Internacional do Libro de Bos Aires, con motivo da designación de Santiago de Compostela como cidade convidada.
As bibliotecas Guido y Spano e Casa de la Lectura serán os escenarios destes encontros, aos que se suman o vindeiro 3 de maio Diego Ameixeiras e María Meijide. A académica da lingua galega Fina Casalderrey abrirá estes encontros coa conferencia 'A LIX como carne de cangrexo', que será presentada polo secretario xeral de Cultura, Anxo Lorenzo.
Ademais, o representante do Goberno galego mantivo esta mañá unha xuntanza co director xeral do Libro, Bibliotecas e Promoción da Lectura da Cidade de Buenos Aires, Javier Martínez, na que ambos abordaron as estratexias promovidas polos seus respectivos departamentos para reforzar os servizos bibliotecarios, impulsar o sector editorial e promover a lectura entre a cidadanía.
Percorrido polos murais de Seoane en Bos Aires
A Consellería de Cultura da Xunta de Galicia e o Ministerio de Cultura Goberno da Cidade de Bos Aires colaboran tamén na difusión dos itinerarios culturais polos murais de Luis Seoane. Con este obxectivo, Anxo Lorenzo e Josefina Delgado presentan hoxe no stand de Galicia un novo material divulgativo que inclúe máis de vinte murais do artista situados en lugares públicos e tamén na entrada de edificios particulares de Bos Aires.
Nesta iniciativa para dar a coñecer na cidade unha das figuras máis salientables da arte galega do século XX destacan dous circuítos: un no barrio de Belgrano e outro que abatca os barrios de Recoleta, Retiro, San Nicolás e Balvanera.
A programación galega na Feira do Libro de Buenos Aires está accesible en www.cultura.gal/librogalegobaires16 e o desenvolvemento das actividades pode seguirse a través das redes sociais, en Facebook n Libro Galego Buenos Aires 16 e Twitter (librogalegobaires16 @librogalegoBA16).