Nova: As Feiras do Libro de Galicia chegan por primeira vez a Redondela

Redondela (Pontevedra), 16 de xuño de 2016.- As Feiras do Libro de Galicia chegan este ano por vez primeira a Redondela. Desde hoxe e ata o 19 de xuño, a Alameda do concello pontevedrés será o escenario desta nova cita co libro e coa lectura, promovida pola Federación de Librarías de Galicia en colaboración coa Consellería de Cultura e Educación, e que conta co apoio do Concello de Redondela e da Deputación de Pontevedra.

A programación, que foi presentada en rolda de prensa, preséntase baixo o título “A muller na palabra” e contará coa participación dalgunhas das voces de referencia da literatura galega actual, como Fina Casalderrey, María Solar, Yolanda Castaño, Iolanda Zúñiga e María Xosé Queixán. Esta última será a encargada de abrir o programa da primeira edición da feira do libro de Redondela, que ofrecerá durante catro días preto de 20 actividades para lle achegar á cidadanía o libro e a lectura.

Celebración colectiva arredor do libro
“Desde a Xunta de Galicia dámoslle a benvida ao municipio de Redondela a esta celebración colectiva que conta coa implicación imprescindible dos nosos libreiros e libreiras, que converterán a Alameda do concello nunha fiestra aberta á produción editorial máis recente”, afirmou o secretario xeral de Cultura, Anxo Lorenzo, quen recordou que a cita de Redondela e mais a do Porriño –o pasado mes de maio– son “as dúas novas incorporacións do calendario das Feiras do Libro de Galicia 2016”.

Tamén se referiu á importancia do concello pontevedrés na difusión do libro, ao tempo que puxo en valor o labor do servizo bibliotecario municipal a prol da dinamización da lectura.

Canda o secretario xeral participaron na rolda de prensa o alcalde de Redondela, Javier Bas; a deputada de Cohesión Social e Xuventude da Deputación de Pontevedra, Digna Rivas; a concelleira de Muller e Igualdade de Redondela, Teresa París; e Nani Regueira, en representación da Federación de Librarías de Galicia.

Obradoiros, contacontos, presentacións e sinatura de libros centran as propostas da programación da feira, que comezará o xoves, ás 20:15 horas, cun relatorio de María Xosé Queizán arredor das súas obras ‘Sentinela aberta’ (Edicións Xerais) e A boneca de Blanco Amor (Editorial Galaxia), e que rematará o domingo 19 de xuño, ás 19:00 horas, cun coloquio sobre a muller na literatura a cargo de Fina Casalderrey, Iolanda Zúñiga, Ana Tierra e Yolanda Castaño, como coordinadora.

Programación en 14 concellos
A Federación de Librarías de Galicia e a Secretaría Xeral de Cultura promoven as Feiras do Libro para favorecer o comercio editorial e a dinamización da lectura, cun calendario que este ano deu comezo o pasado mes de abril en Pontevedra e que proseguiu por Ferrol, O Porriño, Lugo e Ourense.

Logo do seu paso por Redondela, as Feiras do Libro de Galicia chegarán a Ribeira (do 23 ao 26 de xuño), a Vigo (do 1 ao 10 de xullo), a Rianxo (do 21 ao 24 de xullo), á Coruña (do 1 ata o día 10 de agosto), a Viveiro (do día 12 ao 15 de agosto); a Foz (do 18 ao 21 de agosto); e, finalmente, a Monforte de Lemos (do día 24 ao 27 de agosto).