Nova: Esgotadas as prazas para contemplar no Gaiás as 'bágoas de San Lourenzo'

Santiago de Compostela, 11 de agosto de 2014.- A Consellería de Cultura, Educación e Ordenación Universitaria informa de que están xa esgotadas as prazas para contemplar a choiva de estrelas de mañá, martes á noite, desde o alto do Gaiás a través das ‘Visitas astronómicas’, que celebra unha sesión de observación especial para descubrir o fenómeno das Perseidas, tamén chamadas 'bágoas de San Lourenzo”'

Ata trinta meteoros por minuto, se o tempo acompaña, poderán ver a noite deste martes, 12 de agosto, os participantes nesta sesión realizada que arrancará ás 22,30 horas na dársena de autobuses da Cidade da Cultura. As prazas –un total de cen- están esgotadas, demostrando o enorme interese que esta actividade que combina lecer e coñecemento esperta entre a cidadanía. De feito, están xa esgotadas as prazas para todas as sesións restantes no verán.

A xa tradicional Noite das Perseidas permitirá contemplar no alto do Gaiás, sempre e cando o tempo acompañe, a choiva de meteoros nun escenario excepcional. As tamén chamadas ‘bágoas de San Lourenzo’ poderán observarse desde a Cidade da Cultura coa axuda de monitores do Observatorio Astronómico Ramón María Aller da Universidade de Santiago, de quen ademais recibirán nocións básicas para aprender a mirar o ceo a simple vista.

Como en todas as sesións das Visitas Astronómicas, os participantes aprenderán a identificar as diferentes constelacións coa axuda duns planisferios ao tempo que observarán planetas, cúmulos e estrelas dobres.

Esgotadas todas as sesións
O programa de Visitas Astronómicas continuará este venres, 15 de agosto. As seguintes sesións terán lugar os venres 22 e 29 de agosto e o 5, 12 e 19 de setembro, todas elas teñan as prazas esgotadas desde hai días. En total, ao rematar o verán 1.100 persoas terán pasado polo Gaiás para participar neste programa, que cumpre a súa quinta edición.