Nova: Atardecer no Gaiás despídese con María Rodés, Adrián Costa e Toy

Santiago de Compostela, 26 de agosto de 2014.- O ciclo Atardecer no Gaiás despídese esta semana con tres citas imprescindibles: a copla indie de María Rodés, a actuación do bluesman Adrián Costa e o rock psicodélico dunha das bandas máis destacada do momento, Toy.

Atardecer no Gaiás volveu na súa cuarta edición a poñerlle música, ritmo e poesía ás tardiñas de Compostela cun total de 24 concertos de balde, durante os xoves, venres e sábados de xullo e agosto. Tras dous meses ofrecendo os máis variados sons, o ciclo chega ao seu fin e faino cunha despedida por todo o alto.

O xoves, 28 de agosto, subirá ao escenario da praza central a catalá María Rodés, que ofrecerá un concerto diferente: copla sen desgarro, sen sufrimento nin dor. A través do seu último traballo, María canta copla, esta cantautora intimista e de delicada voz converte este coñecido xénero popular nun himno ‘indie’ cheo de ensoñacións e cancións únicas coas que gozar ata a posta de sol.

O venres 29 será Adrián Costa, bluesman compostelán coñecido por ser o cantante e guitarrista de Los Reyes del KO, quen ofreza unha actuación en solitario na que tan só estará acompañado polo seu ‘maquineto’, un vello sampler co que animará á xente ao baile.

E a gran festa de despedida terá lugar o sábado 30 de agosto e estará cargo dunha das bandas do momento: os británicos Toy. Apadriñados por The Horrors e tras xirar polos festivais más importantes de Europa e EEUU, Toy despregará todo o seu indie/rock psicodélico n fin de festa deste ciclo co que gozar ao final do día. E ao acabar o concerto, a festa seguirá ata a madrugada na Cantina do Gaiás, onde terá lugar unha sesión de dj’s a cargo de Nano Vinilo, DJ Flaber e VJ VHF.

Servizo especial de bus urbano
Todos os concertos de ‘Atardecer no Gaiás’ teñen lugar na praza central da Cidade da Cultura a partir das 21,00 horas e a entrada é de balde. Cunha duración entre 60 e 90 minutos, os asistentes a ‘Atardecer no Gaiás’ poden baixar ata o centro de Santiago ao finalizar os concertos grazas a un servizo especial do autobús urbano C11: os xoves e venres sae do Gaiás ás 22:45 e os sábados e festivos ás 22:50.