Nova: Daniel Minimalia presenta o videoclip rodado no Gaiás con Rosa Cedrón

Santiago de Compostela, 8 de setembro de 2014.- O guitarrista Daniel Minimalia presentou esta tarde na Cidade da Cultura o videoclip do single de adianto do que será o seu segundo traballo, ‘Olas del Sur’, rodado no complexo do Gaiás en colaboración con Rosa Cedrón. O artista estivo acompañado polo conselleiro de Cultura, Educación e Ordenación Universitaria, Xesús Vázquez Abad, quen aproveitou para convidar a todos os galegos ao concerto que Minimalia ofrecerá o 12 de setembro no Museo Centro Gaiás.

‘Olas del Sur’ é o adianto do segundo disco de Daniel Minimalia que levará por título ‘Arenas de luna’ e que sairá á venda a primeira semana de outubro. Tras o exitoso debut con ‘Cuentos Sonoros’, Daniel Minimalia ofrecerá a súa vertente máis orgánica e racial neste segundo traballo, que se distribuirá en países como os EUA ou Alemaña, e co que emprenderá unha xira nacional en cidades como Madrid, Valencia, Sevilla, Málaga, Barcelona, Lugo, A Coruña ou Ourense. Finalizada esta xira viaxará aos Ánxeles para realizar a presentación en Estados Unidos.

Para a gravación deste primeiro tema, Daniel Minimalia contou coa voz de Rosa Cedrón e a dirección de Carlos Seijo, responsable do videoclip que se presentou esta tarde e que foi rodado nos interiores da Cidade da Cultura. O artista destacou a elección dos interiores da Cidade da Cultura “pola súa contundencia estética, o seu minimalismo, a súa arquitectura sintética e rítmica e por ser un espazo ideado para a creación e para os creadores”.

Concerto no Museo Centro Gaiás
Vázquez Abad, pola súa banda, gabou a profesionalidade de Daniel Minimalia que, a pesar da súa xuventude, “cativou –dixo– a público e crítica nacional e internacional co seu primeiro traballo”. O responsable de Cultura agradeceulle a elección da Cidade da Cultura como escenario do seu traballo e aproveitou para convidar a todos os galegos a gozar coa música deste mozo no concerto que ofrecerá o vindeiro 12 de setembro no Gaiás. Daniel Minimalia subirá ao escenario do Museo Centro Gaiás para presentar algúns dos temas do seu próximo disco, ‘Arenas de luna’. A partir das 19 horas e con entrada de balde, o guitarrista despregará toda a maxia da súa arte.

Con esta actuación, o departamento que dirixe Xesús Vázquez Abad busca ofrecer a todos os visitantes da mostra que desde marzo se expón no Museo Centro Gaiás. Así, ademais de descubrir a beleza da auga doce a través das obras de artistas do talle de John Constable, David Hockney, Gerhard Richter, Louise Bourgeois, Mario Merz, Martín Chirino ou Chema Madoz; os visitantes que se acheguen á Cidade da Cultura poderán gozar cos sons deste novísimo compositor e guitarrista galego, nominado aos ‘Hollywood Music Awards’, un dos certames musicais independentes máis prestixiosos do mundo.

Grande éxito de crítica e público
Daniel Minimalia, nado en Vitoria hai 28 anos, pero criado en Ourense, editou en 2012 o seu primeiro traballo en solitario, ‘Cuentos sonoros’, co que cativou a crítica especializada e público ao mesmo tempo.

‘Cuentos Sonoros’ contén doce temas, todos compostos por este prometedor músico, que configuran a súa propia fantasía sonora. Desde moi novo aprendeu a tocar varios instrumentos –guitarra eléctrica, acústica, española, baixo eléctrico e piano-, o que lle permitiu realizar un traballo ecléctico que transita por xéneros diversos que van desde o clásico ao new age, a música étnica, o pop e a música de raíz, pasando polo rock sinfónico.

Todo un universo de melodías que narran pequenos relatos, historias que teñen a guitarra como actor principal, arroupada sempre por diversos instrumentos como o baixo, a batería, a percusión, a voz e o piano.